10.25.2008

失戀BINGO




最怕安慰失戀的人,因為失戀對我來講,比痛肚「all lance」咁不值一提,世上有咁多緊要野唔理,掛住失戀,即係無病呻吟啦!扮醫生安慰一個假病人,呢d AV三仔劇情,我唔識寫更加唔識演,所以每每有人失戀找我要傾訴,我就會興高彩烈地回應「我最近識左個新情人,我他好到不知咁好,諗緊結婚... 定生仔先..... 」九成人聽見都會知難而退(就算知我是說謊,但都明我係拒絕聆聽)但總有種人是基本我答什麼都推唔甩,這種人叫「騙人」

朋友片仁來電說買了支Glenlivet Cellar Collection 1967,唔跟朋友分享會折福,於是純情的我,就被約到其家中,門一打開,見另外有位朋友阿呆已經早過我來,我已經有不祥之兆,因為阿呆是不飲酒的... 甫坐下,阿呆便跟我擁抱,拍拍我背「巴打,麻煩晒!」,我望向片仁,見他回避我的目光,已經心知發生了什麼事,所以支Glenlivet Cellar Collection 1967好唔好飲?我完全唔知,因為全部都係背脊骨落....

我去廁所sms片仁過來傾傾,片仁有備而來,我來不及開口,佢已經搶快開腔,「有個遊戲好好玩,係由〈開會bingo〉演變過來的..... 」
我討厭玩遊戲,因為我討厭守遊戲規則,但這個遊戲我喜歡玩,玩法好簡單,把失戀者常說的九句話或者十六句,二十五句都可以,視乎你想玩得快d定耐d,然後填上這九格、十六格、二十五格上... 我當晚初入門,由九格開始,我的九句話是「我做錯左d咩?!」「我有咩比唔想佢(新歡)!?」、「點解佢要咁對我?!」、「我真係無左佢唔得呀!」、「我無事喎!」、「我係咪好無用!」、「我好想打電話俾佢呀!」、「分開左成個人解脫晒」、「點追番佢借我d錢呀!」

遊戲開始,就跟玩Bingo一樣,只要朋友阿呆說中我格中的說話,而連成一線,就算中獎,分別是Bingo中獎是叫「Bingo!」,開會Bingo中獎是叫「Bullshit!」,但失戀Bingo則是誰中獎,另一方就要叫一句大家對失戀者最想講,但最唔夠膽說出來的話,那晚我們的說話是「你咁Q蠢!抵俾女呃同飛起你過喎!」

終於我中了「我無事喎!」、「分開左成個人解脫晒!」、「我做錯左D咩?!」,但同時也輸了給片仁的「我無事喎!」、「我提出分手先架!」、「男人大丈夫,何患無妻!」
有得玩,又有得鬧,原來陪失戀者可以咁開心,仲可以有重大發現,問阿呆最近聽最多的是什麼歌?聽開歐瑞強的阿呆,答案竟然是 James blunt的Same Mistake!

失戀就是重新犯錯,犯上相信愛情的錯,受苦也是活該!

7 comments:

Anonymous said...

如果"失戀就是重新犯錯,犯上相信愛情的錯"

咁~分左手再番撻又撻得著咁又係咩呢?

Anonymous said...

He'll never walk alone.

Anonymous said...

灘叔,呢個故事教訓你"唔好貪小便宜"呀

Anonymous said...

他朝君體也相同!!!

~艾菲

Anonymous said...

灘叔..你嘅回歸真係及時啊!你睇今晚利記幾聽你話!記得話俾bu豬聽啊!!!

Anonymous said...

你咁怕失戀人 咁你個情感急救站 有問必答 堅定流呢?? 仲想問下你感情問題....好想得到你的回覆~~~

unkle beach said...

安慰 同救援 是不同