9.20.2008

暗姣







發姣無罪,但明姣就極低手及惡頂,最高層次的發姣是「暗姣」,即是明姣但暗發,你要留心我,先突然發現「嘩!乜你咁姣呀?!」,就即係所有偉大OL們,無論打扮怎樣端莊,穩重,都會不經意露出或透出那一條SHOCKING PINK或桃紅絹面或通花黑色或可愛公仔圖案的~~~.BRA 帶

用過腦總值得人尊重,所以我不但會望,仲會開聲讚「襯得好!暗暗姣!」,但對方通常都會厭煩地回應「你好賤呀!」 說得對!我是賤,仲好賤,因為踢爆左妳暗姣....

男人要暗姣,其實仲要比女人用多十倍腦,首先我唔認為成套黑西裝,打條彩藍色領呔就叫暗姣,佢只不過係唔想似一個酒樓CAPTAIN,但終於佢都係似一個發緊姣的酒樓WAITER!有時一件白恤衫左下角有兩個用粉紅色繡的小圖案,又或者一幅粗框深黑色眼鏡臂尾端的小小一粒發光水晶.....

以前我的暗姣全放在「老底」內,即是說你要知道我暗姣時,已經俾我姣緊,仲會笑住心甘命抵地俾我姣,試想想當妳發現一個「READY」的字,立體的呈現妳眼前,妳除了笑住接受,仲可以點?你唔認同咁係暗姣唔緊要,因為我更加唔認同你裡面著住條「豹紋」、「T-BACK」、「營光黃」老底,就代表你暗姣,咁只係暗器,仲係有毒暗器,一見到就中毒會嘔!
但隨住近年交頭比較淡靜,再加上就算條老底有幾暗姣,焦點都只會留係上面的肥腩,所以我珍惜子彈,將暗姣的力放在另一個地方....






我大部份工作都係坐係度,拍檔、同事、老闆的視線總不會長時間看著你的臉,當他們擔天然後望地時,最吸引到人的,除了鞋外,就是一直被褲腳遮掩的「襪」,我用了近一年反覆試驗,已經成功令迪偉、朱芬,電台其他同事,電影公司的OL、家人.....發現及同時話「你對襪駛唔駛咁姣呀!」,最近連一位億萬大導演兼電影公司大老闆都突然話「阿MATT,你D襪駛唔駛對對都咁靚呀?!你都算好野!係對襪到發姣,又唔揚果度好野!」我當然扮無野,但心內暗喜!「肯定諗好耐黎襯架啦!怪不得交唔到劇本啦!SIDE晒D時間係最唔覺眼的地方!」
佢根本就係唔抵得我,所以公報私仇!

『暗姣無罪,物傷其類!』

你的暗姣又放在那裡?

10 comments:

櫻記士多*Ada* said...

斷片佬,係咪奀豬比你架!!

Anonymous said...

Lace/geogrous print panty hose

Anonymous said...

做咩要話你知放响邊到吖...話明係暗仲爆出口..傻架!

你對襪真係好姣...我以為只會阿禮或者阿占至會著呢類士帶佬o既襪..唔通你老來嬌!?

Anonymous said...

眼裡~ 仲識閃嘅tim. 哈哈哈哈哈哈~

However, 你對襪真係好drop dead gorgeous! 讚~

Anonymous said...

i like this socks, ver nice :p

Judes said...

Every women have a pair naturally grow! Haha!

Unknown said...

would like to have a look for ur SOCKS collection.... hehe

Anonymous said...

我都會好似你咁,著shocking pink 或red in colour既socks,就係想俾人睇~幾型~
le期著豹紋底褲,俾d fd見到,係,我認,我本身想著俾男朋友睇,但俾d fd見到,佢地笑我,我覺得係佢地唔敢著,其實骨子裡超級想著~~~btw,"暗姣"le個term好得!!

pasLeSweetie said...

對襪係畫頭,有睇頭的話會令人搵個源頭..
如果推出襯絕嘅老底+短襪,唔知有冇人買呢.

3 (avis) said...

哈! 我都最鍾意著姣色襪~