9.07.2008




失戀的人都總是異常積極,學烹飪、學插花,學唱歌,學化妝,學腳底按摩,學全身按摩,學八國外語,學打拳,學投資,學睇波,學飲酒,一日睇七本書,一晚睇八套中外電影,一早睇住太陽昇起,一小時寫九篇blog,一分鐘都唔願靜下來,一秒鐘好似一年咁長.......去滑水,去旅行,去整容,去信教,去鬼混,去做義工,去遊行,去排隊,去血拼,去賭場,去馬場,去歡場,去試場... ... 與其說是要從失敗中學習到要增值自己,準備下一次戀愛,倒不如坦白承認,我怕有空閒時間,就會想起他(她)

朋友最近失戀,口口聲聲要改變突破自己,要做平時相反的事,朋友是一位「寒友」(超級孤x寒友),佢認為睇travel&living 就已經等如去晒全世界所有國家,「電視睇得仲多,仲精彩啦!」,因此佢係從不出埠,上次出埠都係因為公司團年晚會抽中大獎,去過台北三日兩夜;所以他的一反常態,是要去旅行,仲要去歐洲,仲要話跟埋我九月尾過英國睇波!

「頂!我至x憎照顧失戀友,難得半放假,你跟Q黎做乜春呀!Dee你!」

但當然我沒有把心底話照直同朋友講啦``

「好喎!你又過黎就好玩喇!我又多個伴睇波,夜晚搵人飲下酒,傾下偈都無咁悶丫!你快d去訂機票,聽講爆晒呀!」

「我唔信一張first class機票都訂唔到?!有機票就搞掂晒啦!住咪同你住一間房咪得囉!」

「頂頂頂!我得Q閒同你同房咩?!我預晒俾A貨 Kate Moss,唐人街 Keira Knightley, 黑版 Kristen Dunst,你要去咪自己訂埋房囉!」

但當然我沒有把心底話照直同朋友講啦``

「就咁決定啦!」

然後我就天天閉目誠心求神,心裡面只有三個字「無機位!」,重覆又重覆地唸著,一日唸過萬次.... 終於求得神多自有神庇佑

「佢老味!去英國真係好爆,咩class都無機位!」

「YES! YES! YES!天有眼呀,你老味~`感謝神恩!」

但當然我沒有把心底話照直同朋友講啦``

「唔x係嘛!倫敦有冇咁巴Q閉呀?!你去晒全個歐洲,就係唔好去倫敦!」

「我調番轉喎!佢咁Q串我就偏偏要去睇下,睇下佢憑乜咁串?!」

朋友說罷我已經有一股不祥之兆從心而發,走遍全身,但當然我沒有把心底話照直同朋友講啦``

「咁家下真係無晒機位喎!你諗住排Waiting List呀?!」

「梗係唔駛啦!我飛巴黎,再轉過來倫敦咪得囉,去法國大把位!」

「頂頂頂頂頂頂頂頂頂頂頂頂頂頂頂頂頂頂頂頂頂頂頂頂頂頂頂頂頂頂頂頂!」

但當然我沒有把心底話照直同朋友講啦``

「咁都俾你諗到!真係唔預你都唔得!高高高~`」

然後我再天天閉目誠心求神,心裡面只有兩個字 「復合!」重覆又重覆地唸著,一日唸過十萬次.... 終於求得神多自有神庇佑

「我個EX 復合了... 她跟同我拍拖之前的EX男友復合!」

「天呀!咪玩我囉!你知我想邊個同邊個復合架!唔俾佢地復合,都唔駛安排同第個復合丫!好x大鑊架.... 我 !」

但當然我沒有把心底話照直同朋友講啦``

「咁咪仲好!一了百了,唔駛諗咁多無謂野!」

「不過今日我都唔係最主要要講呢樣野!我check過好多網同睇左好多書呢,係英國而家有一隻「蒸漏水」係專俾初生貓狗飲,飲完佢地成長就會同一般貓狗有分別... 」

「有咩分別呢?」

「飲左呢隻水貓狗會易教好多,同埋佢地d吠聲同貓叫聲會溫柔好多... 」
「嘩~~咁呢隻水真係好勁喎~`」

「我而家決定代理佢返來香港賣,根住就上北京、上海開鋪.... 香港大陸咁多人養寵物,呢次想唔發都難,預埋你一份架!係咪兄弟先?!」

「嘩~`簡直要立『投名狀』啦!」

「呢次過英國,我打算去羅幾箱返香港,當版來做推廣,到時你幫我手羅兩箱!」

「頂~~~~~~~~~!我鬚刨都爭d嫌重唔想帶,你要我幫你抬兩箱比貓狗飲的水!你係咪黐交左總掣呀`~~!」

但當然我沒有把心底話照直同朋友講啦``

「好呀!橫豎我stay behind果幾日都無咩野做~`」

「另外呢... 我發現係巴黎近郊有個以前釀香檳阿叔,佢退休後繼續種葡萄,最近種出一隻新品種提子,食左可以有壯陽之用.... 仲有西班牙馬略卡呢個小島,有一種海沙可以治便泌.... 意大利拿波里..... 」

終於係兩個小時內,我收到的order包括要抬兩箱英倫水之外,還有八盒巴黎壯陽提子,四袋西班牙通便沙,三公斤市值唔過一磅的拿玻里有助護膚的整pizza麵粉,七枝可以減肥的蘇格蘭古堡蠟蠋座,同理半公升可以催情的匈牙利黑熊眼淚香水,佢仲要我全程係飛機試用,直至有空姐投懷送抱為止,空中少爺都得....

失戀的人跟飲醉酒的人所說的話,都不可以盡信,否則你欲「好唔得閒」,但失戀者跟黑社會一樣惹唔過,所以通常作為失戀者朋友好似我呢d,都會因為「怕左佢」而盡量遷就,但當我正想向電台請個半個月假,陪佢去晒英法意西蘇匈,我又收到佢電話

「喂!你知唔知宇宙有幾大?你知唔知我地其實幾渺小,情情愛愛根本就係微不足道的事,世界上有更加多更有意義事情等住我地去做... sorry!我唔去英國喇,與其情愛中無人識欣賞我的愛,我就把我所有的愛獻給需要愛的人,好似四川班災民,我聽日就返四川協助重建!」

「你終於都想通!早就應該係咁啦!」

今次我把心底話照直同朋友講
「放心啦!我真係想到通通透,失戀咪就係要我地知道,失戀其實微不足道,不值一提,世界上有更加多更有意義事情等住我地去做... sorry!我唔去英國喇,與其情受中無人識欣賞我的愛,我就把我所有的愛獻給需要愛的人,好似四川班災民,我聽日就返四川協助重建!」

「頂~~~~你做乜Q講完又講呀!煩~`」

但當然我沒有把心底話照直同朋友講啦,我根本沒有出聲,靜靜地聽著朋友重覆又重覆地表示已經想通及要做比愛情更有意義的事.....

都說失戀的跟飲醉酒是一樣,都總是重覆說著同一番話,雖然都是不能盡信,但我仍深信朋友說「我不去英國」是真話,絕不會反悔!而事實上,往後的幾天也沒有收到朋友的電話,我想朋友真的想通了,沒有像其他失戀者一樣,因為挫敗而 好心急想以各式行動,証明自己已經無恙,但心亂如麻,根本無法渣定主意,「新主意」打贏「舊主意」, 但好快又發現「新主意」原來是「無法完成的主意」,然後又有「新主意」取代「無法完成主意」,重覆又重覆,到頭來什麼都無做過,但傷痛隨時間過去亦慢慢復原,一個失戀者就係咁樣 《重生》

然後又再去找另一場戀愛,然後又再失戀,然後.... 一切一切都在重覆,所以慢慢地,失戀已經等如傷風感冒,就算幾嚴重,你知道總會有一日好番,望到岸,仲駛乜驚!

昨夜我收到朋友死聲死氣的口訊留言

「喂!我真係諗到好通好通,大家都係人,點解京奧大家咁支持,殘奧就咁冷落,太唔公平喇!我而家係北京,我撐埋班運動員之後先落四川.... 一個人係另外一個國度,好寧靜....... 好自由...好舒暢...... 好.....寂寞.... 」

朋友說罷抽泣,還越喊越大聲,喊爆我個留言時限為止..... 之後我沒有回覆電話給朋友,因為我怕佢惜D意又返回原先主意,「我都係跟你一齊去英國!」,咁我咪捉蟲入海鮮,自投羅網!況且咁大個人,眼淚流乾就識從新做人架啦!越得到其他人照顧,佢就越唔會堅強起來,同埋佢點會唔再打電話俾我丫!
但我等了一個小時又一個小時,朋友依然沒有來電,心裡忐忑不安,終於我好理性地發了一個sms俾佢

「不見了xx的電話號碼,你有冇?有冇都覆番我!急事!」

一個小時沒覆,兩個小時也沒有回覆!我的心跳開始急促

「條友搞咩呀?!唔係飲大左係房放血呀!dee你丫.... 打俾你唔好唔聽呀?!」

我好想把呢番心底話照直講俾朋友知,我好想朋友聽到.... 終於我拿起手提電話,按下朋友的電話號碼,撥出之後,等侯對方鈴聲響起的死靜,令人呼吸加速!終於傳來了耳熟能詳的歌曲玲聲「My Heart will go on」,go on 左七八轉,朋友仍然沒有接聽電話,而My heart亦真係有d亂,心底同口都同步說著「聽電話啦!」

「喂!我講d野你知,我係北京遇到個高人,佢睇到晒我最近發生咩事!佢話我有段姻緣未盡,我覺得佢講得好o岩!我聽日就返香港,再續未了緣!」

這個消息比擔心他安危更令人不安

「不如唔好搞咁多野!一齊去英國玩算啦!」

朋友立刻提聲開腔

「你講架!係你叫我一齊去英國架!我實煩爆你!低能仔,你真係信撞到個高人,再續未了緣喎!電視劇咩?!」

對話在朋友的恥笑聲下結束,收線後我呆坐在梳化上,腦海一片空白,心情異常紊亂,既唔想朋友跟我己去英國是事實,但更加唔想佢返香港再續未了緣,一廂情願的要求復合,其實是一種滋擾,最受害的不是其舊愛,而 是在他們身邊的朋友,係兩害取其輕之下,朋友肯跟我過英國,其實是比較好的選擇,但都係果句,失戀者講的說話是不可以盡信,於是我又閉目誠心求神,心裡面只有四個字 「改變主意」,重覆又重覆地唸著,一日唸過五十萬次.... 終於求得神多自有神庇佑,我終於再收到朋友電話

「放心啦!我唔會去英國煩住你,阻住你搵食.... 更加唔會做什麼再續前緣,失戀唔係最失敗,死纏搖尾乞憐才是最悲哀!完了就是完了!」

聽到朋友如此正面,我理應滿懷安慰,但我的心跳卻莫明地加速,感應到一個更驚人的消息將緊接而來!說是遲那時快,這不祥之兆就應驗了~

「我收到風xx(ex)下星期會上上海工幹,我諗住落去扮撞到佢,係另一個地方,我地從新開始過.... 」

「大x鑊大x鑊大x鑊大x鑊大x鑊大x鑊大x鑊大x鑊大x鑊大x鑊大x鑊!」

我絕對想照講呢番心底話俾朋友知,但一時間真係嚇到張口結舌,吞吞口水欲開腔之際,朋友比我快一步開口

「你由得我啦,我醒識走架喇~`」

失戀真係同飲醉酒係一樣,表面上好需要其他人照料,其實根本就「無得理!」,無錯~由得佢地啦,佢地醒左就識走架喇,至於幾時醒,就要睇佢造化,幾時睇通情情愛愛係宇宙間最微不足道的小事!


給正在失戀的妳~`

〈醒醒,盡快清醒... 〉林振強先生

23 comments:

Anonymous said...

您真係好人呀 ~

Anonymous said...

祝朋友好運!

Anonymous said...

According to Dr. Tim (881 radio show), those who fall in love are getting sick (hormone inbalace). But how cum those who broke up are even crazier & more ill:}}

Anonymous said...

她/他需要時間醒..不可以沉太長(限期最長是半年),當中亦需要朋友支持。當然無論朋友如何的幫助或支持,醒或不醒,甚麼也好都要靠她自己... one thing I personally don't support is have a rebound relationship, that's a stupid thing ever!

Unknown said...

依家想買9月機票去英國, 係無可能...太多學生(香港 and 大陸) 要返去開學啦! (係大學, 有好多都係10月先開學)

失戀大哂, 我都情願俾朋友煩, 總好過佢地無啦啦消失。不過, 以我觀察, 失戀人士都係想搵人講野, 你有無聽到唔係太總要. 對話中只要聽頭中尾3個部分, 基本想都明哂佢想講咩. 同埋只要你係咁依俾反應就ok, 佢地就會以為你有專心聽. (當然你個樣又唔可以太心不在焉) 佢地講哂要講架野就會收線. (不過可能10分鐘之後又打來...)

你又去英國??!! 睇邊場波呢?

(唔知你有無去過, lake district 風景如畫, 不過係 lancaster 附近, 即係係manchester 再上d!! )

欣欣 said...

失戀既人向來都傻傻地.

理佢又驚佢越來越傻,
唔理佢又驚佢做傻事。

佢地有一大埋歪理,有一大埋嘢想做。

最好都係由得佢,唔傻過又點會捱得過。唔好傷害自己傷害人咪由佢想做乜咪做乜囉!!~

jpky2727 said...

失戀既人係好似食咗毒藥拱,佢地會好諗唔開,想唔通,好需要人幫助和聽佢地講野,佢地唔需要人給意見,因為,佢地都唔會聽得入耳...但我相信,佢會好快無事既...病好了就會醒嫁啦... ^.^

Anonymous said...

好多字 ar ~ 我鍾意!哈哈

其实一段感情最大0既用处是俾你了解你自己,唔系了解其它人

Teresa

Anonymous said...

weather has been bad in london these few days. it's a good time to visit though cos the british pounds has been weakened (dropping and dropping...)!

Melody said...

angie 講得岩..你真係好人..

我有個friend 佢最近試過兩次o係晚間新聞既時候打俾我去講佢d "不停重複又重複"既野..一直講到點幾鐘...

我已經無咁好耐性..o係佢第三之打俾我時...就唔接佢既兇鈴喇...

Anonymous said...

這個朋友對你一定很重要,但以你的聰明才智,要擺脫他應該唔難;你這編文章用了3仟多字來形容目前的苦況,可是你還沒有對這朋友放棄,這點很能表現出你的同情心及義氣。

強力建議,他出發到上海前,你給他一份"大紀元"報然後向上海機場海關報串,我相信他這次會真正的經歷人生的別一件大事,而對感情之事,會有一個終極的改觀及睇法;請放心去做,拘留一日留應該會放人,沒甚麼事的!

Anonymous said...

我未試過失戀嘅friend搵我,真好彩~~

Anonymous said...

唔係劉律呀話?!

Elaine Ma Ma

Anonymous said...

人生得一傻朋友 .. 夫復何求?

Anonymous said...

London!!! Here we go~~~ ^___^

pasLeSweetie said...

失戀=將兩個靈魂釋放
失戀=「埋單」~找咗前世欠人果條數
失戀=令身邊好友認識各自的內心世界
失戀~~何樂而不為呢?!

我喜歡英國,尤其係York 充滿貴族小鎮色彩,然後順道再上lake district, 路程遠咗少少,值得一到嘅

Anonymous said...

你位朋友識到你真係十分幸運,喺佢迷失嘅日子裡有你陪佢傻、關心佢、擔心佢。

雖然當佢每次來電你都好似嫌棄佢咁,
不過你仍然一次又一次陪佢傻,証實咗你吔係好「巴打」

Anonymous said...

灘叔,我好少睇人blog咁多字會一字不漏咁睇晒...證明你寫既blog幾咁好睇XD

Anonymous said...

多謝安慰.
清.

Jenna Michelle said...

Sud Lun is like a coma. May all Sud Lun Yan wake up soon.

Anonymous said...

睇到你都幾無耐...
睇到你失戀fd仲無奈...
第一次睇你打咁多字haha
祝你會有個愉快旅程

Chi said...

Haha, I agree you're too nice! Do you ever wish you can be a nasty person and a bad friend to others?

Sun Lun = on Drugs

Anonymous said...

你真係好應該叫你位朋友仔睇返你 2006-06-30 嘅 Blog ...

入面有段:
被情人拋棄,你傷心欲絕,不停想自己不好的地方,越想就越無自信,越無自信就越醜樣,越醜樣就越無自信,越無自信就越去想自己的問題.....唔駛一個星期,你已經變成廢人!
轉反轉頭想,自己就算有一萬個問題,但仍比對方優勝!因為對方唯一的問題就是「無眼光!」,然後就離開呢個題目,因為再想又會返回上面的循環陷阱....

睇完呢段嘢 ... 坦白講 ... 就算我原本有事都變無事, 唔醒都馬上變返精靈 啦 as
根本就唔係我嘅問題 吖嘛, right~!? ^^