7.30.2008

關你屁事




我有個男友,年少時一齊出去玩,佢無次臨入場前,就後突然向後退,以發號司令的語氣叫出 『放埋個屁先!』,每次一定係響屁,每次都一句送尾加句『響屁唔臭!』風雨不改,總之臨入場前,就算kate moss同其他超模經過,佢都唔理要暢快完成為止,我同其他朋友試過因為咁,成晚係場內避開佢,唔肯認係佢朋友,因為我地試過遭全場人,逢經過我地就掩鼻!佢放屁,關我屁事咩!

但後來我發現呢位朋友係我認識放屁朋友中,最坦誠,最為人著想的一位!放屁的原因大致有兩種情形,一種是因常吃一些產氣的食物,例如地瓜、 洋蔥、高麗菜、豆類及其他豆制品,所以會有放屁的情形,另外則有可能罹患 「激躁性大腸症候群」,此症臨床上也會有腹痛、腹漲以及放屁等現象產生....而我認知當緊張時亦常常會放屁,我這位朋友是那種一年三百五十日都留在家讀書、溫書、睇書的人,每次出街就像探險一樣,緊張是難免的!但難得佢夠坦白,事先聲明,有時間俾大家走避,有時行動快過把口,佢仲會補多隻gag娛賓 『屁乃肚中戲,誰叫貪心嗦入鼻!』肯聲明自己會放屁是一件好型的事!吳君如每次放屁都開聲『放番個屁先~~』放完仲會撚個表情,樣衰衰咁加句『舒服晒!』,唔型都有得笑,我以前同佢做節目之前warm up,我都會要求佢『喂!放個屁黎笑下先啦~`』,佢每次都好坦白 『aiya!岩岩放左,又唔早d開聲!』、『今日無乜屁放~`』『等我試試......有d可能喎...你等等...』

王晶係現場寫劇本,一集中就會放屁,大家附近位置,一見到佢個身向外側,另一邊臀部微微蹺起,一秒內你走避不切,不但中屁彈,仲要俾佢叫住你『阿matt!你過黎聞下,唔係你d女俾我媾晒!』說罷放聲大笑....

有幾多人可以坦白面對自己個屁,做一個〈真心測試〉,在電梯內,你知已經無法控制,一定要放一個屁,你會點處理?

A:坦白開聲『唔好意思!我忍唔到要放個屁,對唔住!』
B:放完之後道歉
C:唔出聲放屁,當有人不悅質問『邊個放屁呀?!』,你會承認及認錯
D:唔出聲放屁,當有人不悅質問『邊個放屁呀?!』,你死都唔承認
E:唔出聲放屁,當有人不悅質問『邊個放屁呀?!』,你第一時開聲否認『唔係我呀!果邊飄過黎架!』
F:唔出聲放屁,當有人不悅質問『邊個放屁呀?!』,你反問對方『你咁大反應,個屁係咪你放架?!』
G:其他

請踴躍作答,做個勇敢放屁人`~

36 comments:

Anonymous said...

有o的別字﹐有幾句唔係好明添。。。

I choose D. :)

Joey said...

G
(對住朋友) 唔駛望, 我特登既!
(對住d lift客) 炸唔知, 死都抬頭望住顯示併(即係去到第幾層地獄嗰啲)

pansy said...

D.....死都唔應.

Sarah HO said...

我會係:
C:唔出聲放屁,當有人不悅質問『邊個放屁呀?!』,你會承認及認錯

咁你呢Matt? 你都冇講你會係點做...^^"

Chrixcape said...

G:扮無事發生

屁又唔係一定響同臭o既 XD

pvc said...

答G: 嘩,聞唔聞到雞脾味呀!?

記得有一次同幾個同事响電梯內,其中一同事放咗個響屁,然後說: 「excuse me!」响嗰一刻我竟然諗起黃子華曾經一句: 「excuse me 都臭架...」不過我只係心諗啫... :p

Ceres said...

我揀A啦,敢作敢為嘛
放屁乃係自然既事了,雖然間lift係好臭

Angie said...

揀 C

3 (avis) said...

有次, 同男朋友搭火車, 由廣州返香港, 放左個屁, 冇聲的, 勁臭。當時男朋友細細聲講:「嘩邊個放屁咁臭呀?!! 頂~~~」我細細聲答:「唔知呢, 可能係坐對面果pair couple卦...」

到左羅湖, 轉東鐵, 到粉嶺時男朋友又提起:「頭先火車度唔知邊鬼個放屁, 臭到呢......」我先dup低頭, 細細聲答佢:「其實係我......」佢笑爆完之後就鬧爆我...

咁你覺得我會揀邊個答案呢?

ahyee said...

睇吓臭唔臭啦,如果唔臭,就扮冇嘢啦梗係
如果好勁, 就死人都掩鼻(只係剩番對眼嗰隻)
怒啤是但一個人
如只有我同另一個人,就望第二喥囉

有一次上瑜伽堂,我聼到前面好似响左吓,個鬼仔即時另轉頭指指自己,笑
呃,我可以點,上緊堂,又唔行得開又要做動作,只可閉氣

Anonymous said...

C........

真係有人問咪認囉.....哈 !

sugar19sugar

20 said...

D

不過個心就講句sorry~

Anonymous said...

梗係陰d陰d 咁放(無聲)
如果有人問邊個放,就唔出聲…

如果成架 lift 只得兩個人就……大家在心中啦。

Season said...

G:唔好意思,然後係一班包公,包婆面前,補多句,放鬆下La香港人,香港其實可以好臭!!!

eddiegc said...

D, 扮冇野最好啦~

Eva said...

B: 放完之後道歉

Chi-Wai said...

sorry... D, i'll lie :(

Anonymous said...

G.唔出聲扮唔係自己,掩鼻, 之後"係咁e" 望下其他人...

Monkey said...

G... 我會睇下其他人o既反應, 一定唔會第一個掩鼻 (因為通常第一個掩鼻, 人地會覺得係你放...哈)

Monkey

櫻記士多*Ada* said...

坦承過失,一句sorry,唔係個個做得到!!

April said...

視乎質問『邊個放屁呀?!』0個位人兄係邊個!
如果佢樣樣衰衰咁, 我會答"F"然後期待佢既反應; 如果佢睇黎只係一時沉唔住氣但本性善良的(一齊搭電梯0個分零鐘既時間應該睇唔出咁多野),就會答C lor...

janjan said...

My answer usually is: C:唔出聲放屁,當有人不悅質問『邊個放屁呀?!』,你會承認及認錯

However, if the questioning person is rude & over-react, then I will choose F:唔出聲放屁,當有人不悅質問『邊個放屁呀?!』,你反問對方『你咁大反應,個屁係咪你放架?!』or look at him/her with a remarks "so"!

Dear D said...

多數啲人都會扮無嘢架啦!但如果真係有人咁好奇嚟質問我,咪虛心啲反問番佢:關你屁事?!

小紅 said...

熟人的我會事先張揚, 所以我會選擇 A

陌生人的話咪G lor...
但係一行出lift口就即放...haha

Brian Hui said...

G.
1. 按最接近的一層樓,門一開衝出去放屁。
2. 如果真係忍唔倒,打一個好大聲的"克痴"掩護放屁,然後講對唔住,就當係對放屁一事道了歉。

kuri said...

開頭梗係唔出聲啦
有人問,咪話[關我咩事呀 望住我做咩姐我夠聞到臭啦]
(笑)好失敗嘰自辯..
不過我搭親車立 有人放屁都冇人會出聲問

打呢個comment都放左2個XD

Anonymous said...

DDDDDDDDDDDDDDDDDDDDDDDDDDDDDDDDDDDDDDDDDDDDDDDDDDDDDDDDDDDDDDDDDDDDDD
(夠多未?)

Elaine Ma Ma

Louisana said...

i'd pick C.

liza said...

i choose B, 因為我真係試過,
不過只在好熟的朋友面前才可以,
因為放屁不是罪 ma,
個是如果是在不熟的朋友面前就,,,,,
我揀 C ,

softcool said...

通常o向公眾地方,我都會慢慢慢慢咁放o的屁出泥,咁就又唔臭又無聲;如果好似開炮咁一野放出泥,就算唔臭都實響啦!
人地就算聞唔到臭味但知道有人放左屁,感覺都唔好受......
so...my ans should be [G]

東妮 said...

G:其他

海光,請問女士們在公眾場合極需要放屁可以點做?

雖然是生理需要,但是屁在公眾場所放就是輸了,點都唔會同〝型〞掛勾。

美女的屎不是粉紅色有星星閃令令,女士們的屁可以好臭,甚至比麻甩佬更臭!唔係個個都是吳君如小姐,型到可以食住句「放番個屁先。」

廿幾歲女要點做先至唔會俾人大扣分?
如果你是女的,你會點吖編劇?

櫻記士多*Ada* said...

sorry!遲來的選擇, 我揀B

Melody said...

SORRY...我呢排真係忙到死左....無咩黎CHAT 同留MESSAGE...

UM....G

我會好小心MAKE一個放不出聲既屁(機會率好高)...跟住睇下臭唔臭...唔臭即係無人發現啦啦隊

如果臭既話...跟住就會CHOOSE D, HEHE...

正野 said...

好賤格的先發制人...
睇吓邊個唔好采。云求指住個人仔:「你個屎人樣拱沼,d沼氣肯定你流出黎架喇﹗」ho ho ho﹗

Constance said...

我選 c 呀~~
我試過認左係咁比人笑....XD
仲話我核突....我即刻反駁
"放屁你未試過咩..."

joyce said...

G...自己出lift OR 叫D人出lift :p