11.08.2007

遊玩時開心一點不必掛念我.......




不經不覺,媽媽已經去左美加近兩個月,我們一個電話也沒有聯略,母子的性格當然相近,去玩時千祈唔好打黎煩我,多餘掛心會製造壓力,玩得就無咁盡情,但當然我是知道她一舉一動,因為我KEEP住收到擔起照顧佢表弟妹EMAIL,最新消息是,她剛剛去到紐約了,好似已經是兩個月內第七個城市,正!還有表弟告訴了我一件事,我笑了一個上午,而這件事我覺得我有需要通知父親,於是我打算節目後,去找他吃早餐兼爆料佢知,點知......


我節目一完,電話就響,是爸爸來電,我拿著電話,不其然深呼吸,有一種不祥之感,因為他是從來不會主動打給我,除非有大件事發生.....

終於我冷靜情緒,刻意裝出一副輕鬆的聲調 『點先?強哥,搵我有咩好野?』 『阿光,你忙唔忙?』,當他開口問這一句,我心知不妙,就算幾忙都只會答『今日成日都唔駛做野喎,想點?』 『你返黎屋企先講啦!』

我沒追問下去,只輕輕說聲『轉頭過黎啦!』,收線後就飛奔離開,跳上的士,講了地址後,更加了一句電視劇常見對白 『司機,我趕時間,唔該你快D!』

沿途我在想可能發生的情況,「他身體不適,要見我告之噩號...」、「他無聊打掃房企,打爛了母親的珍藏...」、「他突然懷疑自己性取向.....」、「他自詡是棋皇,遇上老千局,輸錢欠下巨債,大耳窿臨門追數....」、「他襯媽媽不在,媾條女帶番屋企玩SM,個女人暴斃家中....」....幸好司機以快而穩的技巧,火速就送我到目的地,否則再假設下去,我會覺得老豆應該被阿蓋達組織睇中,派去刺殺布殊!


終於入到屋,他越是神態自若,我的不安感就越強 『飲咩呀?茶定汽水?』,我終於按捺不住,單刀直入
『你究竟搵我咩事?』

他施施然坐下,左手輕按「人中」舒壓,右手指著前面,我沿他的手指望過去,他指著的就是關了的電視,終於真相大白了,一部除了睡覺時才關上的東西,現在閉關,只有一個可能性,「壞左!」,仲要係壞到無法啟動,否則就算得番手指尾咁大個畫面,佢都會繼續開著.....

母親不在他身邊,他懂得照顧自己,但沒有了電視,他失去了依傍,從此就看不到佘詩曼、除子珊、鄧萃雯...他徬惶是可以理解,但作為一個大男人兼父親,始終有尊嚴,怎能承認自己因無電視睇徬惶失控,要兒子放低所有工作來救助!於是他的說法是這樣的 『部電視無端端開唔著,我唔睇無所謂,我驚佢爆炸,你睇睇咩事?』 『我睇就唔驚爆炸呀?!』 其實當然是不用看,就知道要買過部,,用了十年,日日長開,早應該俾人百年歸老啦! 買新不是問題,但那裡有電器鋪是十點已經開門做生意呢?!




原來是有的,是那間在屋村內,已經開了三十年,轉了三手,由阿爺轉到外孫打理的殘舊「電器鋪」,早開門做生意外,還貨品齊全,最重要還是有現貨,可以即買即自取,但由於人手不足,不設送貨!

於是我跟老豆就借用人家的手推車,聯手把電視推走....回去時,我還以為會上演另一幕「單車」的情節,因為推電視,我與他並肩而行,再次有親蜜接觸....但可惜,推的只有我,老豆殿後看風景,還不時口不對心地問我「駛唔駛幫手呀?!不過你搞得掂架喇,我盞越幫越忙....」 你份人真係「真心」








更真心的是,回到家後,他二話不說,叫我唔好搞咁多,首先要收到亞視先,滿以為他是為了看我的節目,但原來他還有另一位心儀女藝人,就是每逢下午重播的「再見艷陽天」女主角陳秀雯~~


當電視TUNE到亞視後,他就再沒跟我說話,沉醉於她的演出中.....




一對老伴相處幾十年,總會有天要分開,我常覺得走先的是快樂的,但走先的總會擔心在世那位沒有照顧,沒世藝....且看今次暫別,他們各有所忙,活得不知幾快活,幾有寄托....

我本來想跟父親說的是,「表弟話媽媽在那邊變得熱情奔放,見人即SAY HI,然後就攬,十足十一個西婦.....」,但我相信當時鄒太的地位,應該被陳秀雯取代了,就算不是她,也已經被「電視機」取代了... 對老人家黎講,老伴當然是它....



老伴離去不傷悲,最緊要有部電視機




我一直唔睇電視就係咁原因!

14 comments:

櫻記士多*Ada* said...

媽媽年紀漸大我都怕收到她電話,真是會出一把冷汗,因為以她的經歷真係搞唔好先找妳,即係好大鑊!灘爸係電視,我媽媽係洗衣機...佢搞笑到話我讀咁多書連洗衣機都唔識整,讀書同整機有咩關係呢?大家都有對QQ親人...

小朱飛刀 said...

即使想起家有喜事....
無了電視...世界末日呀!!!無陰公呀!!!

Anonymous said...

i feel for you! my father has kinda same hobby. the difference is my father always sit at the same place of the couch, once he sits there, it's kinda like got glued..that's how he watches tv! except when dinner is ready or he needs to weewee otherwise it's hardly to see him walk away from there!!

the worst thing is since our home stalled the movie channel, he even stays up late to see those old movies till midnight... we all are sure he sees more movies than us :p

at last but not least, you are a very good and sweet son! :)

Anonymous said...

灘叔你講得岩,
只要你一開始睇電視就會停唔到
會係咁追追追追追
如果有一日冇左電視就會坐立不安
太依賴一樣一旦失去左真係好恐怖!!!

Katherine said...

Dear 灘,
笑死人,估你唔到,以為你想講爸媽有幾掛念對方,原來又是另一些事!我屋企3個人、3架電視、睇3個唔同台。對老人家來說,電視真的是最好朋友、最佳娛樂。千奇不要低估電視力量。

Anonymous said...

Uncle屋企冇電視睇
慘過Gag佬度唔到計

Anonymous said...

-helenato-

你用手推車推番部電視返屋企,
好草根,
可惜無畫面睇羅,
但係諗落,個畫面應該幾爆笑,
係咪?

秀秀 said...

你駛唔駛咁好笑,世伯都唔放過!

Anonymous said...

海灘,我老豆都係叫強哥,不過巳经唔喺度十幾年,佢係D老派人,唔曉同仔女溝通,又或者係我以前後生D,唔識同佢溝通,不過佢走咗之係一路都無セ点掛住佢,但係近幾年年紀大咗,反而時時想起佢,見到人哋同D老豆咁好(好似你同你爸爸咁),自己就好遺憾,如果佢在生時,好好地同佢相處,人生可能不一樣...呢D嘢都係老生常談~~
所以呢...每次想起我老豆,都会提醒自己對亞媽好D、好D、再好D!

Anonymous said...

such a sweet & touching entry : )

Pessimist said...

老咗冇電視為伴唔緊要...
最緊要有部電腦嘛~
Uncle Vogue!

Anonymous said...

您好鬼搞笑 . ^^

Anonymous said...

高潮疊起!

幾時會有電影新作?

Anonymous said...

你已經好正~強哥ge精警對白仲正!!!
我係咁叫我daddy mammy的-->
喂靚仔靚女咩事??!!