2.08.2007

寫乜揮春




做演藝呢行,尤其是近年,放假的時間,總比開工多,所以好怕比人問
「最近搞緊乜?」
「休息緊」 「job都唔想接,咪放下假先羅」

為何不可以直接回答 「我無野做,無工開!」

因為每當我這樣回答,對方一定報以一個難以置信的面容「你點會無野做呀?」

已經無工開,還要費唇舌向你解釋嗎?!於是我在無工開的日子,已經度定幾句袋住傍身。

「家下搞緊咩呀?」 「家下搞緊肚,好想ALLS!」

「呢排有咩做緊?」 「做物弄人!」

如果問我「呢排寫緊乜?」,我就一定答

『寫緊揮春!』

有次我遇到個高手,我答完「寫緊揮春」,佢即刻再問 「寫乜揮春」,我海灘並非旺旺仙貝,更絕不是泛泛之輩,我以零點零一秒極速回答高手

「小見瘟神」「多見旺人」

高手即時還以顏色「唸精學懶」 「搖頭輕嘆」

我無心對戰,所以好快就出絕招

「咁多人死」 「唔見你死」

我與高手惺惺相惜,相視而笑!

「地動山搖」「繼續無聊」



所以寫乜揮春,我一直係知架!但想不到今日我在這些英勇義士面前,竟然落得如斯下場

「後生仔,你想寫乜揮春?你講得架喇」

「唔該幫我寫「攤開黎講」丫」

「!?邊有人寫d咁野架?」 「你又話講就得?」

「都唔係寫d咁野架!」

然後義士諮詢身旁的另一位義士「佢話寫咩「攤開黎講」喎?」,那位義士聽罷即開腔
「唔會寫d咁野,揮春唔會寫埋d咁野!」 「咩咁野呀?」 「總之唔寫啦!」




做人最難開心見誠,因為攤開黎講之後,往往得不到所要,卻洩露了自己所想,得不到並不是最痛,讓人家知道你恨,才是在傷口上洒鹽!

但我仍然相信那個講到爛的說法,「試就五十巴仙機會,唔試就零機會」,今次義士認為「唔知我up乜春,所以唔肯幫我寫揮春!」,但終有一天,「灘開黎講」不但會成為新一代長壽揮春,銷量比「出入平安」多出幾百倍,「灘開黎講」更加會成為大家解開心鎖的百合匙!


BTW,如果大家要寫揮春,又會寫乜揮春呢?

7 comments:

teresa said...

i will write : I love beach
hahahhaha~~~ ^^

Anonymous said...

好锺意睇啲轉數快的高手過招,就算心情普通都即刻開心晒。
仲記得你同三姑鬥講押韻嘢嗰次,諗起又會心微笑。
自己創作能力低,無乜貢獻。

Anonymous said...

我鍾意「灘開黎講」,唔好估估0下, 但通常此句一出, 必有人回我「費時理你」.

Anonymous said...

唔理乜春, 唔該加餸

櫻記士多*Ada* said...

如果我呢?我諗我會寫:
今時今日,無咩唔得!!

Anonymous said...

我係北角都見到有人幫寫揮春
近排攪緊咩野,呢句說話有好有唔好
你係日理萬機,就可能要show下power
如果近排無野好攪,就真係....講唔出口
你做呢行,唔係日日有野攪
正常打工仔,日日返工,仲有咩好問
如果有人打比我,問我攪咩
我真係會答佢"返工囉,唔洗做呀"
咁都好問........白痴

你想寫攤開黎講?
咁又係唔似揮春既....人地老一輩
都係龍馬精神 馬到功成.....
比我選擇,我想寫
"日日開心"
"想點就點"
"老細咪嘈"
"位高至極"
"相聚一刻"
"生命因你動聽" ~~ka ka...肉麻

Anonymous said...

i like財色兼收
heehee~~~~