12.18.2009

Sorrish



有些人很容易說「I Love U」及「Sorry」,容易說I Love U,當然就容易會說Sorry!例子:向情人提出分手時,情人死纏「你親口同我講過I Love U 架!」「Sorry呀!真係好Sorry,妳就當我當日無講過或者講錯左啦!」由於要一再強調,所以會用好多個「Sorry!」,因此到頭來講Sorry係多過I Love U 好多倍;而後來差距變得越來越大,就算減少亂說「I Love U」,但「Sorry」就依然越說越多,就比見面時Say HI還要多,因為好多時我們跟其他人見面,第一句就係say Sorry!「Sorry呀!臨走俾老細捉住,搞左我半個鐘,唔係唔會遲到!Sorry!真係Sorry!」遲到半個鐘都講三句Sorry,更何況有時遲交貨,「Sorry!真係Sorry!我知遲...所以我真係好Sorry!總之聽日一定有...Sorry...我知道遲左好多,但係...總之真係Sorry,我應承你呢次係最後一次同你講Sorry,聽日一定有....我點會熄電話失蹤呀...上次...Sorry羅,今次信我啦.....」而到另一日依然未有貨交,就只可以繼續用無數Sorry去回答及抵擋老闆的爆鬧,令Sorry的使用率達到OVER的程度,但都未夠激嬲情人時的使用量驚人,簡直係達到「濫sor」的地步「Sorry呀!Sorry呀!Sorry呀!我真係Sorry呀!我講真架,我好Sorry呀,你要點先信我係真心講Sorry呀?我無誠意同你Sorry,都唔會Sorry咁多次啦!Sorry呀!你俾次機會接受我Sorry啦!你唔原諒我,我就繼續講Sorry,Sorry到你原諒我為止,Sorry......」真係一sor sor到尾,Sorry N次方!如果環保份子有日關注到「濫用Sorry」的問題,這類「濫梳人」,一定被上街示威聲討

「Save the World,Stop Saying Sorry!」

物以罕為貴,過濫就當然唔矜貴,但最濫的東西,往往就是最大眾化,事實上,「Sorry」常掛嘴邊的族類~Sorrish,佔了人類族群的大部份,就等如唔環保的人,一定比環保份子多。你有試過一日未聽過一句「Sorry」嗎?除非你又聾又啞,仲要盲埋睇唔到人家口形啦,否則你無可能一日遇唔到一個Sorrish,尤其做office的朋友,辦工室是Sorrish盛產地。而成為Sorrish的好處是,你只要用一個最簡單,無人不曉發音的字「Sorry」(就算讀成Solly都一樣通,等如英格蘭同蘇格萬一樣,都是來自大不列癲),就可以肆無忌旦,不負責任去回避一些難辭其咎的錯誤失責行為,無論面對上司,情人,親人,朋友,同事,一有做錯就講Sorry,就算對方聲大夾惡回敬「講Sorry有咩用呀?!Sorry可以解決到問題咩?!」,然後你都繼續死狗地繼續講「Sorry...真係Sorry....」,即使對方拍檯大罵「唔好再同我講Sorry呀!」你仍然可以垂頭極懊悔地,低聲+些微抽泣地說「.....sor..ry....」對方就會自動走開,你未能解決的,對方會係「怕左你!我自己搞」的情況下,幫你去解決晒,而你就可以逃之夭夭,繼續消遙快樂!

所以做Sorrish有咩唔好?!

成為Sorrish,有問題而遇上同類時,就會「梳」來「梳」去,「Sorry!真係唔好意思,我真係幫唔到手!Sorry!」「我Sorry就真,你想我幫,但我幫唔到你,真係Sorry呀!」「你千祈唔好講Sorry!你講Sorry我覺得自己幫唔到手好無用呀,咁我唔單只要同你講Sorry,仲要同埋自己講Sorry呀!」係兩個或以上Sorrish梳來梳去dum波鐘的時侯,就會有「唔抵得頸」的其他族類出手幫你搞掂問題,Sorrish又可以繼續去 梳肝!

成為Sorrish,出到去交際應酬,好容易就可以同人打開話題「Sorry呀!我係咪係邊度見過你呀?」 「Sorry呀!我知好冒昧,不過你真係好似我一個舊朋友,其實係舊情人!」「Sorry呀!你地講緊果個話題,我都想參與呀!」「Sorry!實不相瞞,我今晚真係好需要,妳可以跟我走嗎?」「Sorry!我知我咁講可能嚇親你,但我真係好鍾意妳呀!」

「Sorry」簡直係打開溝通天空的密碼

成為Sorrish,回到家裡,無論你家中的母親,太太有幾煩「問長問短又逼你飲湯」,Sorrish面對她們都頭頭是道,總之無論對方問乜都答「Sorry....」行先 「做乜咁夜返,電話又唔聽?!」「Sorry!今日發生左好多事,不過解決晒,Sorry!我好已經好疲,唔想再講野,Sorry!碗湯聽朝起身飲,Sorry!我想訓先!」,梳到佢貼貼服服,自己就可以舒舒服服!

成為Sorrish,你就可以欠債唔還 「你幾時清番條數呀?!」「Sorry!真係未有!」「咁幾時至有呀?!」Sorry!真係未知!」然後就算換來拳打腳踢的皮肉之苦,Sorrish仍然是意志堅定「Sorry!就算打死我都無用,我真係無!Sorry呀!」

成為Sorrish,你就再不需理會「自尊」、「負任」、「禮儀」、「廉恥」... 能夠放下這些枷鎖,做人一定快活消遙,可惜我對「認錯」仍保持守舊的觀念,就是「減少犯錯,減少認錯!」,所以若要我成為Sorrish,我只能說

「Sorry!我做不到!」

13 comments:

獨臂 said...

係公司遇到d Sorrish真係想打暈佢地,
成日都要人幫佢地執手尾.

Sav said...

同我個女講Sorry, 她的回應一般是 "太遲喇"。 小孩子, 很直接。 挺blunt, 但是事實。

早該做好點,Sor啥個ry嘛 。。。

小風 said...

囧!! 果d打死唔認錯,咩錯都你錯的人仲乞人憎!好似佢成世人都未學過咩叫sorry同「唔好意思」架!!!!

講句sorry要我執手尾都順少少= =
唔x關我事講到好似我係兇手咁要我去搞掂果陣真係勁想翻枱囉!依架奉旨架?當自己係大帝果種人真係唔知佢係咩星球黎架囉!>口<

簡單d,就係明明做錯野都可以比呢個反應的人:「哦?咁又點呀?你仲唔整返好佢?我唔識架!」

龍兒 said...

如果需要同我講甘多sorry的人,即系好對我唔住啦,唔死都無用。

janjan said...

Dignity comes 1st:}}

Anonymous said...

天天都是Soliday

~艾菲

Alexandra Ho said...

Please take it easy!

就是「減少犯錯,減少認錯!」

如果佢識得像你想法, 就不是佢, 就便是你啦 !

Cara said...

Solly, 你講中左呀!

騷緋 said...

I LOVE YOU :)

brian_hui said...

「不必講Sorry!我明白咁都係意料之外,麻煩你交一份書面 report 比我」
這是一個用在office 好有效的方法^-^

Anonymous said...

"Sorry! I love you" (Leon) :-)

Anonymous said...

you are soooo damn right!!! opps sorry for the rude world =)

Anonymous said...

我以前有個同學死唔肯講Sorry,
我好記得佢講咗一句:
「我有咩ry要Sor呀!」
不過都已經是十年前的事了....