MC in MC

如果不是曼城的灰天陰地，我也想不起倫敦原來連續多日陽光普照，沒有曼城的沉悶，也想不起倫敦原來已經不太悶，沒有曼城的親切臉容，也想不起倫敦人是那麼冷漢，沒有曼城人的美麗，也想不起倫敦人的普通，沒有曼城這間酒店，也想不起倫敦酒店的又貴又廢！

其實去到世界各地，我都只喜歡在房間活動，如果房間的空間像這麼的大，環境像這裡的好，我絕不介意長期困在房內工作，有咩開心得過，一間房可以轉咁多個位置，每個位寫到一句，一個月一定寫得起一個劇本

去完咁多個位，個人就疲，可以去訓！

倫敦約會

幾個月生日，收到馬偉豪的短訊，內容大既是「襯還行得、食得，就食多d想食東西，走多d想去的地方！」不知者以為馬生黑心刻薄，實際上，佢可能係以一個過來人身份，提提我四十歲開始，一切真的再不如前！

食量我真的小了，但身形卻繼續發大，路我行小了，但腰骨依然赤痛！情況嚴重到最多十分鐘，就要坐，因為實在是痛到無法展步！小時侯我想過做旅遊領隊，貪可以免費去旅行，但當想起要連續一年去同一個地方，我就將志願改為做的士司機，貪可以變化多同唔駛行！終於我到現在都無做過的士司機，但領隊就做過一次，一次亦係最後一次！因為我真係無咁樣的能力同體力，仲有腰力同耐力！呢三日的行程，如果我是自己來，應該要十幾日先完成到，有人認為去旅行應該一日最多去一個地方，我認為去旅行應該三日先去一個地方，否則你辛苦過返工！

一眾要去shopping，我就腰骨痛到要返酒店，倫敦再沒有東西可以吸引我外出，除非是日本女子的約會！

唔係真架？！講下又俾我約到！兩個不同地方的人，在一個不屬於自己的地方碰面，是一件很奇妙及浪漫的事情！而更加令人難忘的是，在倫敦送一個人回家，就算九點鐘開始送，回程時都已經地鐵撘！






雖然好貴，但真係好舒服，呢個經驗是值得的！呢幅相係個司機自動要同我影，亦都在他問我時，我向英國人說了第一聲「Pardon 」，我隱若聽到他說了兩個音，然後再重覆再問我，我估果兩個聲應該是「dee你！」

倫敦！我俾你dee番架喇！無拖無欠，我聽日走喇！

Pardon~~

機艙內，我的憂累完全消失，因為張開眼睛，距離到達倫敦只剩下兩小時，沒有吃安眠藥，沒有飲到酩酊大醉，我竟然可以在派餐後，看到一半sex & the city就死去了近五小時，我相信原因未必關sex & the city太悶，也未必關班機在零晨起飛，我想最大原因是 「我太疲累了 ~」

BA 的空姐，年紀並非傳說中大，但態度比傳說中壞，但我絕對「唔介意！」，壞得過倫敦任何一位英國朋友？！去歐洲就是「貼錢買難受」的最佳解讀，年輕時，我們對歐洲文化都總是趨之若慕騖`，甘心受盡屈氣，仍然要千里迢迢送上門「買難受」！但人大了，見得多了，就算妳是Kate Moss，對我如果連基本尊重也沒有，我都會「dee你啦！」，然後轉身而去！

在倫敦聽得最多的是「PARDON`~」，就算我英文水平又幾差，我深信「HOW MUCH」你無理由聽唔到！如果你說「PARDON」是你們的口頭禪，咁無所謂，我口頭禪都係「DEE你！」

「HOW MUCH OF THIS？」
「Pardon... 」
「Dee你！HOW MUCH OF THIS？」

《倫敦！我.Dee你！》

人生就是這樣，很多事、景、人我們曾經都深愛過，但到某年某日，因為改變，因為長大，因為沒有原因，這些事、景、人，我們都不再愛，甚至還變成恨！想防止說「我已經不再愛你」或「我現在很討厭你」，那開始時不要愛得太深！
「嘩！愛一樣事、景、人時， 怎可能控制自己，能控制的就不是愛！」

你認同這句話，就請做好不愛時的準備！面對一個人還比較易，但面對一個不愛的城市，其實都差不多，都是一個方法，「尋找它的好處」

住的地方叫Russel Square，位置等同香港灣仔區，即是說去銅鑼灣方便，過中環就更輕易；是學校區，不時見到日本留學女生！這裡的日本女仔跟在日本見的不同，日本的日本女子不敢望人，但其實一直留意你或知道你在留意她，但在倫敦的日本女子，會望妳甚至向你微笑，但好假！我還是喜歡在地鐵內，隔著兩個車廂，全程車望著一名日本女子，她雖然只偷望過來三次，但她一直知道有人在看著，而散發出來的靦，發烤成的媚態，足夠我們在這車程愛上對方！突然間，我又覺得倫敦好浪漫！

看著第一次來倫敦的同事，他們的雀躍感染了我，其實這個城市仍然不錯呢，至小它可以令我們拖著行李，玩鬥快跑到酒店去....

但都話呢個城市串架啦！對佢熱情小小，就立刻顧態復萌！

這個年頭，還可以住到一間酒店是沒有得「上網」，已經是難得，更難得是那位冷艷接待員Kriztine在Padon了我三次及被我DEE了三次後，交出了一個我笑番的答案

「THE Internet signal is EVERYWHERE in the LOBBY！」

即是說如果午夜難眠，要找朋友聊聊，就要落大堂張梳化，把電腦放在擺放花樽的木架上，手還要拿著熱茶取暖，寂寞已經絕望，要這樣解決寂寞，簡直比絕望更絕望！但比絕望更絕望的絕望是，我晨早五點（HKTME 1200）醒了，在痛罵自己「今日唔駛做節目，咁早起身做乜呀？！」然後我就坐在大堂，但坐了近三個鐘仍然沒有一個朋友ONLINE！

我深信這樣的遭遇，絕對是編劇安排，要我們因為呢個起端，去發掘一些或到達一個忽略的境地....


坐在酒店看倫敦的日出，冷艷的接待員Kriztine上班，竟然向我微笑，我亦不介意對方是因為「竟然真係有個傻仔係度上網 」而取笑我，始終對方都是因為我而笑，這樣已足夠在這個黎明愛上對方！

有時要跟一個人撘上，首先要由你不滿對方的東西著手！

「Good Morning Kriztine~」
「Pardon`」
「Dee妳！」


又或者像昨天晚飯時，來了倫敦十六年的新朋友 志偉所說，其實他們說「Pardon」，可能是因為他們真的聽不懂，因為其實倫敦有很多都只是疑似英國人，他們來自歐洲各地，英語水平其實都有限...

感謝「Pardon」令我思考，凡事只要肯從多角度去想，你就知道世事是無絕對！能夠體恤其他人，你會快樂很多..... 當快樂時，你就會想跟某些人分享！
『曼聯！』
『Pardon~~』
『我知道妳曼聯，所以我咪同妳講曼聯羅！曼聯！！』

反轉倫敦

以前好鍾意去倫敦，但再多去幾次，發現所見所聞都變化不大，唯一變得最多就係個物價，一日貴過一日，整佢個掣！但之前帶錢去就玩得，有朋友帶路，或者自己鍾意去邊就邊！但今次要做領隊，要安排 含程 ！時間表好辛苦寫左出黎，不過我同左團友講，除左去睇波果日，其他全部會變，到頭來都係就街行就算！
各路倫敦，曼城，利物浦朋友，有空快email我，晚上我好需要人....同我飲酒，傾偈，高高高~`

第二樣煩係，每次遠行都唔知應該點執行季，總覺得成個衣櫃倒落，但就算倒完，都會覺得有野漏，唔執到出門口都唔會執完，好悶！但想起要搵的東西搵唔到，又好慌！好似無辦法搵到安眠藥一樣！係會好惶恐，尤其係想起今晚坐 BA，隨時遇到六十五歲的空婆，無藥食，D時間點過......







雖然大家一直極小留言，但我知道仍然有好多人會關心我行程，放心！我會盡快UP-DATE！除非我真係反轉到「倫敦」，咁就唔得閒，如果係真，大家都應該恭喜我啦！

龜姦

阿慈個情況，大家有目共睹啦！我以為人先會病完之後慾念異常澎拜，原來龜都係.... 我都搵定劉律，好快會有得打全港第1單龜被姦的案件！

噢.....

本來呢個周末過得不錯，聽歌，寫野，睇電視，仲俾我撞到「李龍同李基」，很久不見，這一刻我仍然會邊睇邊笑，每次睇完都好想打電話俾子華，「嘩！我地加埋係好笑喎，不如搞多次丫....」，呢個電話我一定會打，或者大家見到佢幫我同佢講聲，「猜猜蚌~~」

諗住笑住睇埋車路士對曼聯，同埋家好月圓（我終於明白不愛運動的人，在奧運期間的感受！係好辛苦``！），但係見到阿慈呢幾日沒精打彩，周身無力，成日口擘擘，好似我地感冒咁款，即刻羅去俾附近龜佬睇睇，「下！？龜都會肺炎？！」


都話唔好開冷氣，但天氣實在太熱，阿慈你暫時抖抖，龜佬話三兩日就會好番，喎旦你！

暗姣

發姣無罪，但明姣就極低手及惡頂，最高層次的發姣是「暗姣」，即是明姣但暗發，你要留心我，先突然發現「嘩！乜你咁姣呀？！」，就即係所有偉大OL們，無論打扮怎樣端莊，穩重，都會不經意露出或透出那一條SHOCKING PINK或桃紅絹面或通花黑色或可愛公仔圖案的~~~.BRA 帶

用過腦總值得人尊重，所以我不但會望，仲會開聲讚「襯得好！暗暗姣！」，但對方通常都會厭煩地回應「你好賤呀！」 說得對！我是賤，仲好賤，因為踢爆左妳暗姣....

男人要暗姣，其實仲要比女人用多十倍腦，首先我唔認為成套黑西裝，打條彩藍色領呔就叫暗姣，佢只不過係唔想似一個酒樓CAPTAIN，但終於佢都係似一個發緊姣的酒樓WAITER！有時一件白恤衫左下角有兩個用粉紅色繡的小圖案，又或者一幅粗框深黑色眼鏡臂尾端的小小一粒發光水晶.....

以前我的暗姣全放在「老底」內，即是說你要知道我暗姣時，已經俾我姣緊，仲會笑住心甘命抵地俾我姣，試想想當妳發現一個「READY」的字，立體的呈現妳眼前，妳除了笑住接受，仲可以點？你唔認同咁係暗姣唔緊要，因為我更加唔認同你裡面著住條「豹紋」、「T-BACK」、「營光黃」老底，就代表你暗姣，咁只係暗器，仲係有毒暗器，一見到就中毒會嘔！
但隨住近年交頭比較淡靜，再加上就算條老底有幾暗姣，焦點都只會留係上面的肥腩，所以我珍惜子彈，將暗姣的力放在另一個地方....






我大部份工作都係坐係度，拍檔、同事、老闆的視線總不會長時間看著你的臉，當他們擔天然後望地時，最吸引到人的，除了鞋外，就是一直被褲腳遮掩的「襪」，我用了近一年反覆試驗，已經成功令迪偉、朱芬，電台其他同事，電影公司的OL、家人.....發現及同時話「你對襪駛唔駛咁姣呀！」，最近連一位億萬大導演兼電影公司大老闆都突然話「阿MATT，你D襪駛唔駛對對都咁靚呀？！你都算好野！係對襪到發姣，又唔揚果度好野！」我當然扮無野，但心內暗喜！「肯定諗好耐黎襯架啦！怪不得交唔到劇本啦！SIDE晒D時間係最唔覺眼的地方！」
佢根本就係唔抵得我，所以公報私仇！

『暗姣無罪，物傷其類！』

你的暗姣又放在那裡？

我...我要`~

唔知係咪個市大跌，唔知係咪個天太灰，唔知係咪食左毒奶粉，唔知係咪因為腰骨太痛，總之今日合該有事；無端端下午唔駛開會，然後先發現自己原來一唔工作就無其他野好做，好失落！於是我撲番屋企，網都唔上開始工作，但點都唔想做，好奄悶！我又想起集體請假的念頭，但更想起因為請假而犯下的錯誤，總之做又悶，唔做仲悶！呢d就係傳說中的 「阿爺煮送 麻撚飯 」

最後我都上番網，先知道原來今日個個都唔多妥，原來係大氣侯影響，咁大家請放心，我保証過多兩日，到星期日就無事....

努力想搵d 好笑野cheer up下大家，但通常陪人買野，自己就買更多，陪人去報名港姐，就自己入圍，過大海求人命，到頭來自己輸最多....所以好快我就搵到令自己開心的東西！




浸浴係令我最快樂的事，講緊係自己一個人，焉鴦汽水 加埋我驚搞肚！但呢個堅係可以四圍去，羅出露台浸都得！正正正正！四正！





我要...我好想要，我好想要個男model咁樣身型，唔係我驚會俾隔離投訴我虐畜，係露台用缸水來浸一隻人型大肥豬！

待妳好``

做女人好陰功，因為女人其實壓根底兒，做人都只得一個目標，「嫁個好老公」，首先唔好談論什麼是好老公，根本要搵個唔好咁衰的男人做情人都難，更可況是老公！「好男人都是了已婚，好男人未婚都是基的，不是基未婚的好男人都是舞男或男妓！」妳可能唔肯去承認，但到有一天妳不得不承認這是事實的同時，妳發現妳的青春美貌亦不在，妳最靚的時侯，獻給一個或多個PK、衰人、賤佬、西人....還算經歷過，最可悲是妳的青春美貌，都獻給了寂寞、孤單......然後...找不到人嫁，就嫁了給工作，以工作量，工作壓力去渡日，以為可以忘記自己生出來的目標，但偏偏世上有一個前生可能做了一樣比陳兆龍或蕭永芳更偉大的事，所以今世可以投胎變成李太的徐子淇，面對不可能解決的工作問題時，被老闆無理取鬧時，玩輸政治俾隔離組果個八婆時，匿埋係廁所喊乾喊飽，都會撫心自問「點解我唔可以有個老公娶左我，日日享揊唔駛做！」諗到呢一刻就仲喊得淒涼，因為想起春青不再，二十五歲才是男人至愛！

男人六十歲仍仍可以好有型，女人就比較困難，所以幸運的男人，係應該對女人好好，「要點好？」，好簡單，五字訣「咪就下佢羅！」

妹妹最近忙得不可開交，十日內要飛台北、上海、紐約，但不是點對點，是飛完台北回港再飛上海回港再飛紐約，舟車勞動再加不停轉時差，再加繁重工作及壓力，個人最近完全錯晒！基本上你講乜、問乜，佢都只會回你最負面的答案
「點呀？紐約之旅如何！」
「好辛苦！」
「果邊天氣如何？」
「好差！」
「差唔差得過妳D心情」
「我係咪要笑架！」
「SORRY....係估家庭用品！」
「你好幼稚！」

如果你唔肯「咪就下佢羅！」，來到呢個位一定已經爆發DEE爆佢！，但我唔會咁易放棄架！
「我幼稚都係為左襯妳之麻！」
「夠喇！你好煩！」
「夠唔夠D紐約人煩！」
「咁好難，佢地唔係煩，係串...好鬼岐視，妳問佢野，永遠話PARDON...PLEASE SAY AGAIN...搞到妳覺得自己英文好似好差咁....」
「咁靚唔靚仔？」
「咁又真係幾靚喎！個個D身型都好靚！」
「咁同意大利仔比起上黎呢....」

終於我見妹妹論盡世界各地靚仔的分別，英美意法日德韓上海美男子幫佢帶走大量負能量，然後我可以放心關心佢其他問題
「點解妳隻腳指會咁？」
「我上床時踢中床腳，反晒甲呀？」
「嘩！咁要唔要整容醫生介紹？」
「你留番俾自己旁下身」
「妳對鞋朵花好襯腳指塊膠布，好FASHIONABLE！」
「你唔恨得咁多，FASHION SENSE呢D野唔係個個有！」
「咁『SIX SENSE』（鬼眼）呢？我估應該個個都有！」
「我無喎！」
「真係『SIX SENSE』呢D野唔係個個有！」
「妳好煩！可唔可以講D有意義D O既野！」
「叫外賣食，妳食乜？」
「豬扒沙律！」
「嘩！點解要食同類呢？」
「唔夠妳食得 豬扒多！」
「我話妳係沙律左喎！」

係咪好無聊，係咪覺得好浪費時間，但再無聊再浪費時，都唔及見到一個女人從黑面菜笑番變回開心果！妳話個意義幾大！

〈咪對佢好D羅...佢開心D，個世界就會靚好多~`〉

中秋長周無你修

邊個係中秋，邊個係長周，邊個係無你修，你一睇就知啦，如果你係呢個中秋長周末假期，有得睇戲，有得 游水，有得燒野食，有得睇利物浦對曼聯，有得浦，有得去旅行.....都竟然留係屋企無野做，恭喜你，你可以繼續估邊個係中秋，邊個係長周，邊個係無你修，你估中我送盒蠟蠋連燈籠俾你做中秋禮物！

中秋長周無你修 望月短嘆悶兜兜
中環老尖搵人媾 何苦遭人笑on兜
都怪自己得把口 唯有返床早D抖

一追再追

下個星期日先係中秋節，但今朝返工時，我真係感覺到「秋意」，我知道當你今日返工或食晏時，仍然熱到濕晒，是無可能相信我所講，因為我自己都唔信，所以走左去游水，烈日當空下，何來「秋意」，紅燒豬腩肉意就有一pat，但突然一舊黑雲經過，高溫因清涼疾風急降，腦海中突然響起林振強先生這幾句歌詞《曾經　跟千片葉飄進微冷的秋.....從不知　從不知 何解你充塞我所思 陽光中　無枯枝 何解我心中有秋意....》，老土肉麻到自己都打冷震！但事實上，秋天又來了`~`


我已經是一個零耐性的人，但生命活急促的步伐，快到連提出「不如唔好咁急丫！」都無時間，有半秒閒情，你都只會問自己「咁做法，我係咪好快就死！？」，問完未有時間答，已經又要繼續做！我成日想發起大家試下同一日請假，睇下個世界係咪因為咁而玩完！好可惜我覺得呢個idea是可以搞成一部喜劇，我又高速跑回去工作檯，怕靈感要走，死命追呀追~` 腦裡面不停響起這周耀輝的幾句歌詞

忽然只剩下我自己....

是否我走得太快
還是你走得太晚


抖一抖，又再努力過，高高高`~

纏

失戀的人都總是異常積極，學烹飪、學插花，學唱歌，學化妝，學腳底按摩，學全身按摩，學八國外語，學打拳，學投資，學睇波，學飲酒，一日睇七本書，一晚睇八套中外電影，一早睇住太陽昇起，一小時寫九篇blog，一分鐘都唔願靜下來，一秒鐘好似一年咁長.......去滑水，去旅行，去整容，去信教，去鬼混，去做義工，去遊行，去排隊，去血拼，去賭場，去馬場，去歡場，去試場... ... 與其說是要從失敗中學習到要增值自己，準備下一次戀愛，倒不如坦白承認，我怕有空閒時間，就會想起他（她）

朋友最近失戀，口口聲聲要改變突破自己，要做平時相反的事，朋友是一位「寒友」（超級孤x寒友），佢認為睇travel&living 就已經等如去晒全世界所有國家，「電視睇得仲多，仲精彩啦！」，因此佢係從不出埠，上次出埠都係因為公司團年晚會抽中大獎，去過台北三日兩夜；所以他的一反常態，是要去旅行，仲要去歐洲，仲要話跟埋我九月尾過英國睇波！

「頂！我至x憎照顧失戀友，難得半放假，你跟Q黎做乜春呀！Dee你！」

但當然我沒有把心底話照直同朋友講啦``

「好喎！你又過黎就好玩喇！我又多個伴睇波，夜晚搵人飲下酒，傾下偈都無咁悶丫！你快d去訂機票，聽講爆晒呀！」

「我唔信一張first class機票都訂唔到？！有機票就搞掂晒啦！住咪同你住一間房咪得囉！」

「頂頂頂！我得Q閒同你同房咩？！我預晒俾A貨 Kate Moss，唐人街 Keira Knightley， 黑版 Kristen Dunst，你要去咪自己訂埋房囉！」

但當然我沒有把心底話照直同朋友講啦``

「就咁決定啦！」

然後我就天天閉目誠心求神，心裡面只有三個字「無機位！」，重覆又重覆地唸著，一日唸過萬次.... 終於求得神多自有神庇佑

「佢老味！去英國真係好爆，咩class都無機位！」

「YES！ YES！ YES！天有眼呀，你老味~`感謝神恩！」

但當然我沒有把心底話照直同朋友講啦``

「唔x係嘛！倫敦有冇咁巴Q閉呀？！你去晒全個歐洲，就係唔好去倫敦！」

「我調番轉喎！佢咁Q串我就偏偏要去睇下，睇下佢憑乜咁串？！」

朋友說罷我已經有一股不祥之兆從心而發，走遍全身，但當然我沒有把心底話照直同朋友講啦``

「咁家下真係無晒機位喎！你諗住排Waiting List呀？！」

「梗係唔駛啦！我飛巴黎，再轉過來倫敦咪得囉，去法國大把位！」

「頂頂頂頂頂頂頂頂頂頂頂頂頂頂頂頂頂頂頂頂頂頂頂頂頂頂頂頂頂頂頂頂！」

但當然我沒有把心底話照直同朋友講啦``

「咁都俾你諗到！真係唔預你都唔得！高高高~`」

然後我再天天閉目誠心求神，心裡面只有兩個字 「復合！」重覆又重覆地唸著，一日唸過十萬次.... 終於求得神多自有神庇佑

「我個EX 復合了... 她跟同我拍拖之前的EX男友復合！」

「天呀！咪玩我囉！你知我想邊個同邊個復合架！唔俾佢地復合，都唔駛安排同第個復合丫！好x大鑊架.... 我 ！」

但當然我沒有把心底話照直同朋友講啦``

「咁咪仲好！一了百了，唔駛諗咁多無謂野！」

「不過今日我都唔係最主要要講呢樣野！我check過好多網同睇左好多書呢，係英國而家有一隻「蒸漏水」係專俾初生貓狗飲，飲完佢地成長就會同一般貓狗有分別... 」

「有咩分別呢？」

「飲左呢隻水貓狗會易教好多，同埋佢地d吠聲同貓叫聲會溫柔好多... 」
「嘩~~咁呢隻水真係好勁喎~`」

「我而家決定代理佢返來香港賣，根住就上北京、上海開鋪.... 香港大陸咁多人養寵物，呢次想唔發都難，預埋你一份架！係咪兄弟先？！」

「嘩~`簡直要立『投名狀』啦！」

「呢次過英國，我打算去羅幾箱返香港，當版來做推廣，到時你幫我手羅兩箱！」

「頂~~~~~~~~~！我鬚刨都爭d嫌重唔想帶，你要我幫你抬兩箱比貓狗飲的水！你係咪黐交左總掣呀`~~！」

但當然我沒有把心底話照直同朋友講啦``

「好呀！橫豎我stay behind果幾日都無咩野做~`」

「另外呢... 我發現係巴黎近郊有個以前釀香檳阿叔，佢退休後繼續種葡萄，最近種出一隻新品種提子，食左可以有壯陽之用.... 仲有西班牙馬略卡呢個小島，有一種海沙可以治便泌.... 意大利拿波里..... 」

終於係兩個小時內，我收到的order包括要抬兩箱英倫水之外，還有八盒巴黎壯陽提子，四袋西班牙通便沙，三公斤市值唔過一磅的拿玻里有助護膚的整pizza麵粉，七枝可以減肥的蘇格蘭古堡蠟蠋座，同理半公升可以催情的匈牙利黑熊眼淚香水，佢仲要我全程係飛機試用，直至有空姐投懷送抱為止，空中少爺都得....

失戀的人跟飲醉酒的人所說的話，都不可以盡信，否則你欲「好唔得閒」，但失戀者跟黑社會一樣惹唔過，所以通常作為失戀者朋友好似我呢d，都會因為「怕左佢」而盡量遷就，但當我正想向電台請個半個月假，陪佢去晒英法意西蘇匈，我又收到佢電話

「喂！你知唔知宇宙有幾大？你知唔知我地其實幾渺小，情情愛愛根本就係微不足道的事，世界上有更加多更有意義事情等住我地去做... sorry！我唔去英國喇，與其情愛中無人識欣賞我的愛，我就把我所有的愛獻給需要愛的人，好似四川班災民，我聽日就返四川協助重建！」

「你終於都想通！早就應該係咁啦！」

今次我把心底話照直同朋友講
「放心啦！我真係想到通通透，失戀咪就係要我地知道，失戀其實微不足道，不值一提，世界上有更加多更有意義事情等住我地去做... sorry！我唔去英國喇，與其情受中無人識欣賞我的愛，我就把我所有的愛獻給需要愛的人，好似四川班災民，我聽日就返四川協助重建！」

「頂~~~~你做乜Q講完又講呀！煩~`」

但當然我沒有把心底話照直同朋友講啦，我根本沒有出聲，靜靜地聽著朋友重覆又重覆地表示已經想通及要做比愛情更有意義的事.....

都說失戀的跟飲醉酒是一樣，都總是重覆說著同一番話，雖然都是不能盡信，但我仍深信朋友說「我不去英國」是真話，絕不會反悔！而事實上，往後的幾天也沒有收到朋友的電話，我想朋友真的想通了，沒有像其他失戀者一樣，因為挫敗而 好心急想以各式行動，証明自己已經無恙，但心亂如麻，根本無法渣定主意，「新主意」打贏「舊主意」， 但好快又發現「新主意」原來是「無法完成的主意」，然後又有「新主意」取代「無法完成主意」，重覆又重覆，到頭來什麼都無做過，但傷痛隨時間過去亦慢慢復原，一個失戀者就係咁樣 《重生》

然後又再去找另一場戀愛，然後又再失戀，然後.... 一切一切都在重覆，所以慢慢地，失戀已經等如傷風感冒，就算幾嚴重，你知道總會有一日好番，望到岸，仲駛乜驚！

昨夜我收到朋友死聲死氣的口訊留言

「喂！我真係諗到好通好通，大家都係人，點解京奧大家咁支持，殘奧就咁冷落，太唔公平喇！我而家係北京，我撐埋班運動員之後先落四川.... 一個人係另外一個國度，好寧靜....... 好自由...好舒暢...... 好.....寂寞.... 」

朋友說罷抽泣，還越喊越大聲，喊爆我個留言時限為止..... 之後我沒有回覆電話給朋友，因為我怕佢惜D意又返回原先主意，「我都係跟你一齊去英國！」，咁我咪捉蟲入海鮮，自投羅網！況且咁大個人，眼淚流乾就識從新做人架啦！越得到其他人照顧，佢就越唔會堅強起來，同埋佢點會唔再打電話俾我丫！
但我等了一個小時又一個小時，朋友依然沒有來電，心裡忐忑不安，終於我好理性地發了一個sms俾佢

「不見了xx的電話號碼，你有冇？有冇都覆番我！急事！」

一個小時沒覆，兩個小時也沒有回覆！我的心跳開始急促

「條友搞咩呀？！唔係飲大左係房放血呀！dee你丫.... 打俾你唔好唔聽呀？！」

我好想把呢番心底話照直講俾朋友知，我好想朋友聽到.... 終於我拿起手提電話，按下朋友的電話號碼，撥出之後，等侯對方鈴聲響起的死靜，令人呼吸加速！終於傳來了耳熟能詳的歌曲玲聲「My Heart will go on」，go on 左七八轉，朋友仍然沒有接聽電話，而My heart亦真係有d亂，心底同口都同步說著「聽電話啦！」

「喂！我講d野你知，我係北京遇到個高人，佢睇到晒我最近發生咩事！佢話我有段姻緣未盡，我覺得佢講得好o岩！我聽日就返香港，再續未了緣！」

這個消息比擔心他安危更令人不安

「不如唔好搞咁多野！一齊去英國玩算啦！」

朋友立刻提聲開腔

「你講架！係你叫我一齊去英國架！我實煩爆你！低能仔，你真係信撞到個高人，再續未了緣喎！電視劇咩？！」

對話在朋友的恥笑聲下結束，收線後我呆坐在梳化上，腦海一片空白，心情異常紊亂，既唔想朋友跟我己去英國是事實，但更加唔想佢返香港再續未了緣，一廂情願的要求復合，其實是一種滋擾，最受害的不是其舊愛，而 是在他們身邊的朋友，係兩害取其輕之下，朋友肯跟我過英國，其實是比較好的選擇，但都係果句，失戀者講的說話是不可以盡信，於是我又閉目誠心求神，心裡面只有四個字 「改變主意」，重覆又重覆地唸著，一日唸過五十萬次.... 終於求得神多自有神庇佑，我終於再收到朋友電話

「放心啦！我唔會去英國煩住你，阻住你搵食.... 更加唔會做什麼再續前緣，失戀唔係最失敗，死纏搖尾乞憐才是最悲哀！完了就是完了！」

聽到朋友如此正面，我理應滿懷安慰，但我的心跳卻莫明地加速，感應到一個更驚人的消息將緊接而來！說是遲那時快，這不祥之兆就應驗了~

「我收到風xx（ex）下星期會上上海工幹，我諗住落去扮撞到佢，係另一個地方，我地從新開始過.... 」

「大x鑊大x鑊大x鑊大x鑊大x鑊大x鑊大x鑊大x鑊大x鑊大x鑊大x鑊！」

我絕對想照講呢番心底話俾朋友知，但一時間真係嚇到張口結舌，吞吞口水欲開腔之際，朋友比我快一步開口

「你由得我啦，我醒識走架喇~`」

失戀真係同飲醉酒係一樣，表面上好需要其他人照料，其實根本就「無得理！」，無錯~由得佢地啦，佢地醒左就識走架喇，至於幾時醒，就要睇佢造化，幾時睇通情情愛愛係宇宙間最微不足道的小事！


給正在失戀的妳~`

〈醒醒，盡快清醒... 〉林振強先生

我唔醒就你醒！

Alice Wang/王艾莉，台灣人，畢業於Central St. Martins College of Art and Design BA (hons) Product Design，而現在於Royal College of Art.修讀Design Interactions

呢個鬧鐘創意之處在于，鬧鐘可以同你的手提電話連接，如果你沒有在預設響鬧時間起床，響鐘就會每三分鐘
隨機從你手機通訊錄上，選擇一個號碼撥出去

如果家人送呢個鬧鐘俾你，「你一定係好耐無打電話返屋企」
如果情人送這個鬧鐘俾你 「佢當然係想你通訊錄上只有他或她的名字」
如果老闆送俾你「佢只係想你唔好再遲到，但戒遲到比戒煙更難，所以你記住delete左老闆個電話號碼」
如果朋友送俾你 「佢一定知道你最近好憎某些人，所以借把刀你殺人」


如果我送呢個鬧鐘俾你，你提電上只可以set一個電話，你會擇邊個？

高手~`

有冇人知 『LG』的中文譯名？我一直唔知，但今日我終於知道~~

我有部錄影機壞左，打去LG維修部，過程當然係經過八次重新輸入，四次轉去不同部門，同唔記得幾多次「由於現在線路比較煩忙，接線生好快會接聽你電話...」，來回美加一轉之後，終於接得上理應「可以幫到我」的人，我唔記得佢叫咩名，不過好似只係不停提住「吳芝」，我問乜佢都唔清楚，唔知...我好耐無上腦，今日一上不可收拾，我問佢「問你地乜都話唔知，原來LG中文譯名係「撚知」，乜撚都唔知！」

我相信呢位吳芝小姐，已身經百罵，我呢款佢當係爛GAG一隻，聽完仲會笑一笑，然後不慌不忙回答我
「LG 全名係LIFE'S GOOD，中文譯名一定唔會係你果個！」




大家有冇 試過見到最歡喜的人突然出現，驚到要轉身走，我當時CUT線就係呢個心情，「天呀！超級高人！」，我唔收線仲可以講乜，感謝妳吳芝小姐，YOU DID MAKE MY LIFE'S GOOD！」