七個月前........改變了

炎炎夏日，竟然收到朋友傳來七個月前給她影下的照片，真係睇到滴晒汗，除了是夏天看冬天衫之外，我細看自己一雙眼晴，相當之清醒，我點解會攬住條羽毛，影幅咁相，似一隻有d質素「鴨」〈我唔係自吹自擂，我真係見過無數所謂高質素鴨仔，我絕對覺得自己有得做！〉

咁都未算驚！大家睇睇下面果幅相~~`











究竟我去過邊度？我幾時轉左性取向？呢個畫面點睇，都似一間gay bar，怪不得近半年，我身邊一個hot girl都無出現過，但就有無數hot guys 係我身邊圍圍轉，「噢......呢次真係hot guy了~~`」

惺惺相惜

這個構圖，這種顏色配撘，這些數字，這個級數的組合，現在真的很難看見！







這個年代，我們都欠缺「星」，能夠有兩粒「星」走在一起，是絕對值得珍惜的！

餘韻

其實，我是很喜歡到現場睇波的，從前（都講緊十幾二十年前），每星期日有比賽，我就會走到舅父附近，博他有空，有興緻帶我過海去舊大球場，睇胡國雄、鍾楚維、陳發枝、曾廷輝、黎永昌、安德遜、麥哥利.......到之後（講緊十零年前），自己識同朋友去睇波，除了星期日去睇譚拔士、李健和、譚兆偉、奧沙、山度士......平日一至五，我常常與朋友、情人，甚至自己一個人，亦都會去旺角場食果度出名（唔知好食定難食）的餐蛋麵，豉油皇雞脾....兼睇波，人生十大快事也！

你可以話果d年代，娛樂並不是太多，不是往睇波便是睇戲，但如果是不愛的東西，我是不會去做！
我愛球場的空礦，你可以很自我地大聲鬧，也可以低聲跟身旁的人喁喁細言，和電影院一樣，是一個用很小錢，就可以買回來的「天地」


今次英超四角是超級超值，最貴飛三百五十圓，就可以睇到兩場比賽，其中一場是原價，要超過41英磅的「利物浦vs樸茨茅夫」，好不好看，精不精彩，謝拉特踢左幾多分鐘， 托里斯有冇名不乎實，占士是否把一眾球星比下去，南華是是否貽笑大方.......一切一切都不再重要，重要是我確確實實記得零七年七月尾的這個星期，我在香港看過「英超」，雖然整體上仍然是「A貨」質素，但難忘的事情，有時並不一定是超高質素的東西！









滿足是有餘韻的，回來後不停發出email，相約（其實是再約）世界各地朋友「有機會我過黎荷蘭睇AJAX，記住班我班飛！」 「去stanford bridge睇車仔，賣炒飛，250磅有交易嗎？」 「去睇祖雲達斯個路程係咪真係似小學去大埔康樂園咁遠，咁大工程？」 「去西班牙，馬德里、巴塞、華倫西亞、西維爾睇波，邊度黃牛飛最貴？」

慕尼克、巴黎、大板、里斯本、曼城......還有很多很多球場我好想去，每一站也是我奮鬥的目標！如果大家亦有其同目的地，一起努力，奮鬥吧！ 高高高`~`~ ！

Help

由於要再版，希望各位留言，提供書中錯字，明天前我要交List，高！高！高！

最後

經過這個新書介紹會後，一切來到尾聲，這也是我最後一篇寫「麻不甩」的文章了，明天開始，不要再懷舊，向前望！





我不想只得一本書，也不想到出年書展也只得兩本書，出年年頭，一定要有第二本！





想買我「麻不甩」，要到書局了，書展已經售罄~`

感謝所有幫我創造這個紀錄的「老友」，愛爆大家，等睇新野！

Joe Ma、Sandra、Annchoi、Jessica、Susan、May Lam、劉律、Jimmy......應該仲有好多等緊我送書的親朋前輩師傅恩人....等多幾日，等我去班一班貨！

要感謝都感謝晒，除了兩位女性




每每有人問起我個妹，我只會答「佢好勁！」，點勁？一個可以小時侯跟住個哥跑呀跑，阿哥推門衝入酒樓，道門鐵框兜頭撞爆佢眼角，破晒相仲可以唔嬲個阿哥，未算勁仲有，阿媽出街放低錢俾個阿哥同個妹食飯，個阿哥竟然可以自己煲左煲飯，買兩包「雞心米」（即等如現在的「粟一燒」）撈飯，還口口聲聲出面大快活賣緊二十圓（當時好貴）一碗，我個妹信唔勁，食埋都唔勁，仲可以活到今日，有樣有身材有工作，你話勁唔勁？仲未夠勁我仲有，個妹曾經失業兩年，做阿哥幫唔到手，仲日日叫佢上進點，還有她失戀流落異鄉，長途電話向我求救，我當時卻因為飲醉酒，無安慰之餘，竟然把問題歸疚在她身上，到最近又因一個共同討厭的人，令我狂性大發，再一次，又一次地傷害她，佢都唔嬲，你話勁唔勁？！



就算大家覺得一d都唔勁，無所謂，「珠如！妳是最勁的！」今次無妳，件事一定無咁勁！ 但妳不要留言給我，我怕老土！




第二個女性，很久不見，很是掛念.......！




阿七，我本書好好賣呀







右邊的是阿妹，不但是阿慈的妹妹，也是阿七的妹妹，做妹好易，忍到個阿哥就得！

好亂

7月十九號，我還可以在現場控制自己的喜悅情緒，離開場地後，我high到星期六晚上，好彩有得係「午夜閒談」抒懷一下，否則我會繼續好疲，但無法入睡...

但昨晚仍然是睡了好像沒睡過，九點起身望住電視，睇銀河隊對車路士，但成場踢成幾比幾，碧咸有冇出過場，佢老婆又同邊個來，我完全唔知，心裡只在想，我應該再寫多一篇blog，提醒大家今天還有一個簽名會，但偏偏性格使然，認為咁做好老土，想想下就已經一點，準備出發至發覺好肚餓，快食一個即食麵，換衫出發.....

終於我漏帶了準備好的「十個火機」.....

去到會場外，由於人太多，工作人員遲遲未到，我呆站在門口位，又想有人認得，又唔想俾人認得，這一刻又後悔推卻阿立的盛意，願接送及陪伴我來，更責怪自己為何唔擺「阿哥款」，逼個妹從澳門提前回港伴我入場...d搞事份子想破壞我情緒，我無咁易中計，本書咁耐都等得，無理由爭果十分八分鐘，搞到自己樣衰衰！「麻不甩，M B L，Matt Brings Laughters」

想到這裡，我即刻識笑，一秒後好運就來臨，一個春青艾少的女工作人員趕至，帶我進場~~`






「 好多人，攤位處等簽名的又如何呢？」

心裡只是想呀想，距離攤位二三十米外，我看到了龍尾

「是排我隊嗎？」

幸好很快我便看到他們手持我的書，人數不小呢！感激~~`

眾多老友，我記得你們每一張臉，名字就因為當時心情緊張, 無法一一記實，（真是自慚，自己還在書中教大家記人名，不過我問題應該係年紀老，記憶力衰退機會大d），但當中有幾位，我好深刻！

第一位：sugar19，因為妳靚左好多，既然讚得妳，就可以繼續講真話，妳之前真係錯晒！

第二位：我表妹，因為佢個妹即是我另一個表妹應承一定來，點知派上家姐帶同兩位索女來撐場，真係錫晒妳
還有佢媽媽，即我五姨，佢十九號帶同舅母、二姨，我媽媽一齊黎撐我

第三位：有一位中年漢，他是貨車司機，佢聽晒我所有節目，專程過來撐我，令我想起eason話聽到有司機
「夕陽無限好」泊位時不停在唱，佢知道呢隻歌會大hit！

第四位：身穿英國球衣，戴金絲眼鏡的中年靚佬，行到面前問我 「你有冇自由行fans撐你？」
「無喎！」 靚佬伸起一隻手指 「我就係你第一個！我廣州來的！」 嘩！我都算「味精皇」架啦，
但呢一下都俾佢痺一痺！ 痺到我名都忘記左 靚佬好野！

第五位：我估十三至十七歲左右的一個青年，「你叫咩名呀？」 「我叫...手痕」，唔好意思，我真係忍唔
住笑左出黎 「守衡？」 終於我簽名之餘，亦問問他「仲有邊度痕？」

第六位：病愈的jerry，祝你繼續健康快樂，頭髮有咁長得咁長！｛佢有病時無晒頭髮）

第七位：小朱飛刀...原來妳係女仔！

第8至xxx位：阿bo、silverbell、percy、pessimist、ivy、sogo、ada、vivian、阿bone、cindy
柑、ofvdrf、隱形粉絲、桃、阿米.....數漏再補.....感謝





離開時，出版社老闆derek至，緊張地問員工，「d貨到左未？」，我突然覺得佢似「門徒」內的劉德華，
說的對白也差不多！跟住收到編輯秀慧的SMS，「第一版有機會賣得晒！」









我現在好亂，因為我一方面唔相信是事實，令一方面又其實好開心，所以又不停提醒自己收拾心情，準備明天的工作，但個人跟本不受控地亢奮著，為左感激大家，我決定落街喪食然後喪跑，高高高``

純屬巧合

繼續睇落去，都係女fans，只不過係女fans至肯send番俾我.....睇完d相，我突然覺得要儲番一筆錢


























因為我突然發覺，我似乎真係需要去 『箍牙』

又開始

看似完了的工作，幾個鐘後又開工，希望節目後可以回家，而樓下又無裝修，我要喪訓三個鐘，我就是要這麼多，可以給我嗎？


不想隨隨便便感謝大家，待我回氣後，高跪地訓身感激大家，等我~~`

719 忙到嘔

718~`剛收到會場消息，今日賣出並不是單位數，都無咁醜~`

719~`0600-1100 電台工作

1130-1245 剪下頭髮，搵件衫著都要架，你地個個著格仔，簡直係趕絕我，逼我著第樣

1330-1400 希望趕到去現場

1400-1500 同個八九個老友簽名，影相。附註，明天我是不會為自己拍照的，各位老友影完的相，
第一時間e俾我，我睇過ok先放，你唔俾我，聽日我一幅相都無得放上黎
記住 『雛凱光，恭喜晒！』，以此為証~~

1500-1630 當然要打個round，買個頭round書啦

1700-1900 有個劇本會要開，希望兩個鐘傾得完，因為~~`

2000-2200 我好想回家差兩個鐘電，因為~~

2230-2330 上『架勢堂』，老友們記住 捧場``


要講都講完了，我都差...不....斷......片....了.....最後一啖氣都要講埋，希望聽日見到大家~~

What's Next~~

小時侯有位uncle，他的太太臨盆要生，他竟然帶我到大球場睇波，散場後才帶著我絲絲然走到醫院，看他的初生嬰兒，醫院內的親朋議論紛紛，生為人父，竟然唔理妻兒，走去睇波，uncle以笑遮醜，我一直唔明點解佢會咁做，直至......呢幾日，我終於明白，其實等待「孩子」出生的忐忑，會令人做出不尋常的逃避行為，直至「孩子」真的安全旦生，忐忑過後，真正興奮的心情如大浪般一個接一個的捲過來.....


「他」出生了~~`

























雖然比預產期遲了五天，無法跟 Hilda的 孩子同年同月生，但「他」始終出生了~~`





今天我告訴自己一定要放假，但終於我今日比平時更忙，個腦想得比平時多，好朋友增言「點解要放假，繼續做啦！」，我是一個懶墮的人，總會用最多腦筋去想辦法偷懶，但機會只會給有準備及勤力的人，回到家，發現樓下裝修，一切一切都在逼我繼續向前行，好！謝天謝地，我現在就出去買我要買的手提電腦，明天開始，節目後繼續留守電台工作，環境比在家裡差，所以一定可以集中工作


下一步要成功，就要由這一步做起`~` 共勉之！

沉悶的最新消息

chatboard上秀秀得講的是「真相」，慎防留言眾多，又無設置頂，所以搬上黎當啟事出：



『大家唔使估估下, 書店應該與書展同步有書, 即十八號, 我建議大家去書展時買, 天窗(即 hall 1 1D19)及天行者(GrandHall GHD24 )兩個位置都有賣. 至於海外讀者, yesasia 一定會有, 密切留意啦.』

開朗好開朗

據我所知，我本書昨晚已經有二十本可以到我手，但我約了余迪偉食飯，唔想抽住袋咁有份量的東西，所以....我仲未見過本書

據我所知，出版社老闆睇過本書之後，無表示不滿，嘴角仲戚過一戚，傳說是微到要顯微鏡先睇到的「微笑」......我仲未見過本書

據我所知，話我「驚驚青青，有產前仰鬱」的記者，一定有上來這裡看過，感謝妳，但我現在不知幾開朗......雖然我未見過本書




陽光、Brett Anderson，我不知幾開心！





其實是有點不開心，因為要回到書檯繼續工作了~`

時景人

我是從來未見過雪的，從前很喜歡憧憬第一次看到雪時的地方，跟誰一起看，所有會落雪的地方，所以有可能及無可能的人亦想過後，我其實希望一生都無見過雪景，總好過給我見到了，之後換來無畫的失落與空虛感....

好多年之前，我第一次見到陳可辛，第一件要跟佢說的就是「我一直相信，香港總會有一天下雪！」，我估當時剛拍完「煩煩」的陳導演，一定以為我是恭維他在新作中的一場幻想尖沙嘴落雪的場面，其實近年我再不下一次同佢再講過，但每件事對每個人的重要不同，所以陳導演無任何回應可以俾到我，但我仍然深信有日會發生！

看到這單新聞後，我的信心更增強！我再次在想，香港下雪的一刻，我會在邊樹，同邊個一齊~``Yeah``

雛凱光

每個人總有死穴，我也有不小，基本上我是由死穴組成的，因此，我常常替自己辦「我最死穴的死穴大賽」，冠、亞、季，不設最上鏡死穴，同友誼死穴（呢個只是停辦了幾屆，因為我已經無能為力，所以「係咪friend都唔幫先？！」對我已經再起不到任何損失的可能性）

『雛凱光出新書，麻不甩』

我最死穴的死穴，長駐榜首，寫錯我姓名簡直等同自殺式襲擊，我每次遇到襲擊，都會同自己講「鄒凱光，俾心機，終會有一日，無人再寫錯你個姓名！」，講完再加多隻自嘲gag「已經好好啦，個凱字同光字無錯，以前我的名字是周海江」

後來我研究出一個方法，名為「習以為常」，即是說你抗拒的東西，連繼面對一千次，一萬次後，你就再無感覺，試想想，有變態佬向你露械，第一至三次，妳會好驚，但日日夜夜都不停露，妳只會悶，不會再驚！所以當我知道今時今日仍然搞錯我是「雛凱光」，我就要聽到自己慣為止，大家在十九號及二十二號（據聞二十三號都可能有）出現我面前，要先講會員密碼 「喂！雛凱光！」，（雛音初）我聽得越多，就越有機會衝破心魔....

叫聲雛凱光，包你無暗瘡``

計劃有變

「各單位hold住！計劃有變，Plan A 轉Plan B！」

「無問題....但Plan B係咩呢？over over」

我都唔知，淨係知印唔切，原先十一號出版，現要遲一至兩至三至....天，但最差都一定會在書展前發售，「預產期」通常都唔會百份百，除非是開肚生啦，但我喜歡讓個天去安排~~

Everything happens for a REASON~`

認住正貨

好彩呢個世界有「超聲波」，個仔未出世，就已經大約知係點樣，仲要有九十九個巴仙準確，出版社叫我遲兩日至出，但試問有邊個父母會忍得住，收藏個仔唔俾其他人睇下，尤其是第一胎

有人話不要從cover去評定一本書好看與否，但呢個cover，你唔買，至小唔會憎到叫人唔好買，當然我希望大家都買....

出書並不是賺錢行為，現在世上只有一種是賺錢行為，就是買賣股票，希望大家支持的原因是，有你地支持，我才可以繼續寫下去，繼續把無人肯要的東西寫出來

再一次感謝亦希望各位在港老友，到時要支持我，我好驚

七月十X有售

七月十九（1400-1500，書展簽名會）

七月二十二（1400-1500，另一次書展簽名會，俾多個選擇大家）

我有序

多謝天窗出版社的秀慧逼我，否則以我性格，表面怕煩而其實是懶，一定無動力找他們替我寫序，雖然對方只是舉手勞，但我已經覺得欠了人家很多，不竟一個是一直只會向我追稿，教曉我很多東西（如飲酒，食煙，去玩....）的恩人，師傅，沒有他給予我的機會（如飲酒，食煙，去玩....），我就不會是今天的我；另一個是只有她叫我寫稿，我無可能叫到佢寫字的大名人，還有現在佢比從影前更忙，我上次同佢個女玩半個鐘，疲勞過做三日節目，點忍心還要她用腦拿筆寫字；另一位更加認識多年，但到最近才相真正相識，談不上熟落，最主要是我還欠他劇本未完成，朝見口已經好尷，舊債未清，新債點敢問~~

終於我都開了口，也鬆了一口氣，因為終於集齊他們的「序」，邊個錫我，字裡行間就看得到~` 感激``

香港矽谷

很久沒有到這個地方，十多年前，我是曾經在TVB打燈，當時電視城仍然處身於清水灣，而我就仍住在荔景村，由地鐵出發「荔景、美孚、荔枝角、長沙灣、深水步、太子〈轉車〉石硤尾、九龍塘、樂富、黃大仙、鑽石山.....終於到彩虹站」，就像去歐洲要中途轉機一樣，千山萬水之後，仍然有萬水千山的路要行，由彩虹再撘近二十分鐘公司車，全程賽事完畢，能夠在一小時侯內完成，你就是世界紀錄保持者.

後來我離開荔景，搬到更遠的天水圍去，而後來TVB電視城亦搬到將軍澳工業村裡面，我無福氣再打TVB工，但回心一想，要由天水圍去將軍澳，同由美國西岸去東岸感覺差不多，這個比喻絕對是誇張十倍，因為之後我親身試過，其實並不是那麼遙遠。

由於為某間電影公司工作，而那間電影公司亦都位於將軍澳工業區，就在電視城旁邊，有幸當時我是有車，每日出發時，就致電在美國矽谷工作的朋友，我上班，對方下班，我由天水圍去到將軍澳，對方由矽谷回到三藩市，快者一小時，比較鬆懈加小小小小塞車，已經可以踢一場法定時間的足球比賽，有時還要加時作賽，也試過對方已經回到三藩市，但我仍然在官塘~`

自此我稱這裡做「香港矽谷」










上次到電視城工作，已經是年多前的事，那次是到「15/16」，與FIONA拍檔，最後贏了五千圓，今次我是去「客串」

重臨這段路，天大地大，長空偌大得可以看到陰晴和諧共處，感覺不似矽谷，也不似在歐洲的公路上，感覺竟然似上次到東莞拍攝「怪物」時，在深圳的公路上，飛馳於陰晴不定的空間當中，左右全是龐大但感覺不穩的大貨車，車程毫不享受，因為要集中精神，提防一旦意外發生，還可以先知先覺地，盡最後一點能力拯救自己，擔心坐得萬年車，但擔心會死許多細胞，即是說我點都會死~~SIGH`~









既然點都要死，就要死得有意義，TVB是本港最難入的地方，所以有得去，搵條命博都要，這就是死都死得有意義之說....

一年不見，感覺差不多，但竟然一個熟人也沒碰到，望他們是已經發達上岸，新一代已經接棒...從前我是上一代，轉個身份，我其實還是新一代，我深信會有方法進駐呢個地方，至於是什麼方法，我到現在仍然未想到出來.~~

但呢一日總會來臨`~










講左咁耐，都未講我呢次去拍什麼？不如各位老友又估下？俾自己十六秒時間後插SCROLL DOWN看答案





















































咪就係 『風流醫生俏護士』羅~~`

麻甩之梯

很喜歡在電台的後樓梯流連，光線、溫度舒適，有自己的空間，又不至與外界完全脫釣，這裡是其中一個很好的創作地方....









晚上的感覺更好，更寧靜，好適合創作愛情故事~`

每次在這裡留連，我都幻想自己是一個詩人，不要嘔，詩人在我心目中，只是一個借故唔返工，日日食煙飲酒，飲大就亂寫一堆東西出來的潦倒「麻甩佬」，通常年老還會多病，生前女友就多，死果一刻無人送終，所以我一想到自己是詩人，就立刻會好醒神回到要想的工作上，不過點都好，我覺得件事係好浪漫，至少我是這樣覺得 ~`~





但可惜電台同事對我睇法完全是另一回事，某一次，我又在這裡站著創作，某同事經過，首先是嚇了一跳，然後提高聲線，一定要我聽入耳果種 「嘩！你好似d輸晒馬，想死又唔敢死果d「麻甩佬」呀！」

我當時梗係扮cool，一笑置之，但其實心裡面赤赤痛，我真係咁「麻甩」？

於是我四圍問人，答案通常有幾款，最多的是「絕對係！」、其他分別是「唔係丫！你都好仔丫」、「無所謂啦~~」、「有冇第個問題」、「試下減下肥，曬黑d~`」、「一時時啦，有時都幾麻甩架」，其中唯一一個答案，是我最喜歡的

「你係麻甩，但你幾得！」














早一點聽到這個答案，我就不會拍這幅脂粉味甚重的照片，我寧願麻甩，都唔要俾笑到氣咳！