係咪FRIEND先？

一聽見有人問我「係咪friend先？」，我就知道大事不妙，呢句說話同用把刀指住你條頸一樣，除非你唔怕死，否則你乜都要應承！
「借五千銀黎丫！」
「我成到身家都係得咁多，點借晒俾你呀！？」
「嘩~~~我又無話唔還，你咁都唔幫手，係咪friend先？」
終於我俾佢問左好多次，每次五千，唔覺唔覺佢都爭我幾萬銀
「喂！呢排手緊，還番d錢黎先丫！」
「唔係麻？！你手緊？！你點用錢架？！我有就還左俾你啦！你咁都追，係咪friend先？！」
你咁都講得出，其實你有當過我係friend嗎？
男人得兩樣野會反面，錢銀同女人；我從來唔會同朋友因爭女而反面，因為d女一定係揀我朋友，至於錢呢方面，我借得俾人，就預左收唔番。「無左d錢！都好過無左個朋友！」，所以唔駛再問我「係咪FIREND先？」
有好多人求人做野，心知事情會麻煩到人，但又逼不得意要對方幫手，就會以友情掛帥，但心知大家友情有限，就會好心虛，先聲奪人「咁都唔幫？！係咪friend先？！」我試過答「唔係！」，對方即刻七情上面，數盡多年來在我背後如何支持我，暗中幫忙我，仲因為我食個七隻死貓，其中兩隻係摺耳，頂過十六隻鑊，總全部都係易潔鑊，無整污漕件衫！有時由於要求果樣東西太難，佢會再講誇d，直情講到原來幫我捱過兩刀，同埋捐過一邊腎俾我！講到咁，都係問「喂！幫我班xxx演唱會飛丫！」
報應！真係報應！我曾經都是一個成日搵人幫買演唱會飛的人，成日以為d做唱片公司，實好易買到飛，五年前做左商台之後，我知道買演唱會飛係好煩的事！
首先！買飛果個，當然想指定日子，最靚位，睇完先俾錢！但真相是你訂飛要先俾錢，無得揀日子，d位未必一定靚！你覺得先入錢無保障，同一樣錢但無得揀位唔公平，去到發現個位唔靚，番黎同我投訴，關我咩事呀！阿媽教落無錯，做乜都好唔好做「雞仔媒人」，所以為減小煩惱，原則上你叫我買飛，我都會話我無辦法，「咁都無辦法？！係咪FRIEND先？！」「唔好意思，不如我地絕交啦！」
今次軟硬「long time no see！」我已經訂左四十幾張飛，d「朋友」而家先續係浮面叫幫手訂，我估計仲有排加落去，其實我想過唔好理，訂一百張，我知到時實有人要，但唔該睇番上面條款，係要先入錢，大拿拿四萬銀，我真係唔捨得！
我知大家心裡面想什麼，「點解唔買一百張呀！我想要呀！」
如果你心裡面講過呢句說話，請scroll up再睇過我講乜！如果睇完個心仲係講「咁係丫麻，做咩唔要一百張飛呀！我真係想要呀！」
「喂！我唔幫人買飛架！你仲問？！係咪FRIEND先！？」