睇大圍

我話過要帶七仔離開露台，睇睇外面個世界，順便睇睇醫生，我真係唔想七仔變成跛腳七！呢隻鄉下仔，一上的士就嚇到賴屎，好彩我有個保鮮袋兜住，唔係就一褲都係！驚魂甫定，好竟然活躍起來，係咁爬，都唔知佢緊張定係好似細路仔去旅行咁，個心「創」晒！總之我就好辛苦先帶到七仔去到醫院！

一入到去，登記完，坐埋一邊等叫名，一放七記落椅上，唔駛五秒，七記就生猛到九秒九咁係咁爬，係咪爬... ... 大家睇下，邊似有事呀！

現場經常聽到護士叫「黃豬豬、小白白、車里子... 」呢d寵物名，真係聽一個，打一下屎震！到個護仕正準備叫「鄒.... 七...... 」我聽見個鄒字已經大聲叫「到！」實行以聲蓋聲！有d名，係屋企叫就還可以，出到黎仲用！真係會好惡頂，走果時聽見護士叫了一聲「honey！」我即刻加速走！但後來我想，個護士可能係叫我喎，噢.... 撈！

外藉醫生叫PETER，我大部份時間聽見醫生同七仔講的說話係「YOU ARE SO BEAUTIFUL！」原來七仔係叫做Yellow –Margined Box Turtle，學名Cistoclemys Flavomarginata，醫生唔知中文名係乜！但我找到了！七仔係"黃緣盒龜"，在魚街被叫作"湖南金錢龜"，個性膽小，溫馴，喜歡匿藏於隱閉處休息，愛探頭外望！但資料話呢種龜不善游泳，但醫生就說牠是「Good Swimmer，not Good Walker」
要再搵多d資料先知邊個岩！
但醫生話七仔無骨折，可能是撞傷了肌肉，慢慢就會復原，答得咁虛蕪飄渺，我忍唔住答番醫生「哦！」
細個有唔舒服，去睇完醫生，未食藥就覺得自己好番，希望七仔都會係咁，至於醫生講要整個Resort俾你，你等等啦，我得閒就帶你搞，總之你安心休養，快D行得走得！

我同大圍都算有感情，曾經因探親戚，我成日黎大圍，曾經因為探老友，我成日去大圍，曾經因為送女友，我成日黎大圍，但最多的原因，是因為入馬場，從前愛跑馬，去大圍代表果次賽事贏到錢，因為贏到錢先會食強記雞粥，乳鴿，炒麵！
今日行番呢D地方，懷緬之餘，覺得大圍表面上變了個老人區，但久下久又發現有外藉人仕居住，再睇清楚又有年青情侶... 其實都幾多元化！但d街道同建築，依然保持「新界Feel」，近火車站一帶，仲有很多平房，無高樓大廈地方會令人望得高D，睇得遠D，行得遠D .....

我行左好耐，先發現七記賴到一個保鮮袋都係，似乎七仔都係鐘意城市多D！