Must Keep

「我唔想批評人，但我亦唔想講大話」
所以唔好問對我馮導演的作品感覺如何，基本上我係唔會睇「老馮日記」，但咁多星，果拍法咁新，對一般電視觀眾黎講，係好吸引；但其實吸引唔到我，直到上星期果集，我竟然睇晒，仲覺得Must Keep！
肯Keep的東西，一定有一些收藏價值，這些價值可能係來自其他東西，但一定唔係為左馮導演，亦唔係為左客串的王敏德.... .. 咁係為左乜？
星期六收工後，未夠鐘開下一個會，我去左「鍊腳」，就係呢個過程焗睇，有一個人好吸引我，就係果個羅飛唔俾錢的「ARRON 女FANS」，佢叫阿迪，係電影資深副導演，嘩！幾多戲，有得演，有得跳，呢集佢仲唔係女主角！
認識阿迪近十年了，九七年頭佢二十歲未夠，剛讀完演藝，又剛做「食神」（戲中家燕姐個衰仔，就係佢女扮男裝）佢過左黎幫我地拍「初戀無脹touch」，亦都有份演出梁詠琪、陳彥行同學（佢口口聲聲話陳彥行D戲係佢帶，咁又幾難喎？）亦都係ending我媾左果個，而呢條橋亦都係佢度出來，真係多得佢唔小！之後佢參與過大大小小的電影拍攝，如「頭文字D」、「七年很癮」、「情義我心知」.... 多年苦練，現在已可以獨當一面。
阿迪除左工作上幫我，佢仲係我私人買家，「衫、褲、鞋、眼鏡、i-pod..... 」基本上佢見到岩我東西，就唔駛問幫我買，但相信未來日子，佢唔會再有咁多時間幫我了，因為最近佢密鑼緊鼓籌備緊個大PROJECT！阿囡，祝妳成功！
btw，妳幕前演出實在太浮跨，都係俾心機係幕後發展啦！但呢一集我一定會KEEP！