假如讓佢錯下去

今日係太子「巴黎cafe」開會，如果「星巴克」認左第一，「巴黎cafe」一定係第二，香港、九龍，要搵到佢蹤影，易如反掌。論環境，呢度真係算OK，雜誌又多，當然收費比一般即貴啦，我地坐左六七個鐘，發現呢間d客路都幾多元化，十四五歲至三四十歲都有（當然三四十歲可能只係得我！）














我鐘意呢度，因為呢度好有特色，六七個鐘不停上錯飲料、食物，班so call 服務員（呢個term好大陸，但唔想叫佢地待應，因為...一陣講）真係keep到水準，KEEP住不停「錯」（大家話佢邊有資格叫做待應！同大陸果d一樣，錯晒！）咪以為呢樣勁，最勁係d飲料同食物，可以同一樣野，杯杯唔同味，碟碟唔同口感，正常情況，一間錯漏百出到咁o既cafe，脾氣好就埋單走，脾氣差就拍嘈佢..之後都係走！
但係我地又覺得當佢地錯成咁，不停錯單送上黎的食物，飲料變成RUNNING GAG，服務員變成我地循環再用o既調嬉對像（不論男或女），而飲到一杯好味飲料、食到一碟好味意粉，全是當日的超級福氣所致；所以當們食到那碟好味肉醬意粉，就好似開到枝最好年份紅酒一樣咁開心，一條條慢慢食，食一條就小一條....我們因而學懂了珍惜，感謝！
呢度簡直係樂土，一方面可以工作，另一方面可以開心笑，又可以測試當天運氣，仲可以有人撩，還可以見証時下上樓CAFE與年青人文化，如此這般的一個地方，仲唔係『樂土』
大家要好好珍惜呢遍樂土，要包容、寬恕，我仲會求神拜佛唔好執！唔係又要搵過另一間，好難架！