荃灣沒有 摩天輪

從前在香港只有兩座摩天輪，一個係啟德遊樂場，一個係荔園，兩個都好流，又細又殘，後來啟德執笠，荔園果個殘得更快更勁！唔係我唔會係「初戀無限touch」內，寫左一隻摩天輪壞機噴火gag，其實我覺得係真係會發生！

歐洲四圍都有摩天輪，有大有細，有快有慢，我試下係高富花園坐過一個，快到落地即嘔同暈左半個鐘！但最記得還是在北海道拍七年很癢時，那所colourful的巨型摩天輪~~`



這座摩天輪轉一個圈要十二三分鐘，我們拍攝，一由差池，便要等十二三分鐘後才可以再拍，當時緊張的我，以發問人家難題作情緒宣洩途徑，我問日本製片，為什麼摩天輪不可以轉快一點，他的答案是「夏天就會轉快d，七八分鐘左右，但秋冬就d上左年紀人，所以要十二三分鐘....」 「上左年紀鍾意坐耐d咩？」 「老人家耐d架，後生仔就快手好多？」 「下？！你唔係話上面有人搞野呀？！」 「夏天的學生放暑假，拍拖有咩地方可以去.....佢地邊忍到，上到最頂就造，後生仔，未落到一半就搞掂啦，仲有四份一時間善後....」 我笑到嘴都爆 「咁點解上左年紀就要係秋冬同耐d呢？」 「上年紀秋冬進補，寧捨利害，好多人會同女伴上去....不過佢地手腳慢，起步又慢，所以咪要俾多五六分鐘佢地羅！」

我唔知呢個貌似劉丹的日本製片，究竟講真定係講gag，但佢講完之後，我就全程無坐過，掂過架摩天輪！



我把故事告訴給朋友，叫他試試，他改頭換面，帶愛人去台場的巨型摩天輪上，準備在欣賞日劇名景點彩虹橋的夜色時，向她跪低求婚，夠浪漫掛！點知部摩天輪開行不夠四份一，他的愛人面清口唇白，上到一半，朋友從袋中取出的，不是求婚戒子，是袋中所有的紙巾，因為愛人開始嘔，最後失禁收場...
下次check清楚對方有冇畏高先





無論摩天輪大定小，快定慢，它總會有最低，有最高，有向上，也有向下的時侯，但它從未有停下來！



我還未去嘉年華，唔知點解，見到今年個摩天輪 咁大個有AIA 字樣，我就唔敢坐，硬係似
「今年你坐AIA贊助 摩天輪，就算有咩事，AIA已經為你地買重意外傷亡保險，唔駛驚~`」

唔想坐都想影幅相，但一直無咁閒情，幸好有會員1122 silverbell的一幅佳作借用，又可以慳番唔駛去，既然借得一次，不如乘機搞大，我想收集大家在望界各地，真真假假的摩天輪~~~~照片

angela幫我開條link等大家可以放相上去及去睇！