你搵過我黎？

有些人像季侯鳥，定時定侯就會出現，定時定侯就會消失，今日收到一個陌生來電，她以極嬌嗲的聲線，劈頭第一句就問 『Matt！你搵我咩事呀？』 這位女仕久不久就會找到一個原因打俾我，有試過問人電話，有試過問我要唔要靈芝丸，去奧脫福睇波點買飛，識唔識婦科醫生介紹俾佢媽媽.....有時因為她的創意，會花時間同佢傾幾句，但談不到十句，我便收線，因為她說的東西實在「廢」，美其名就是「為賦新詞強說愁」，坦白講就係「食完飯無屎屙搵人hae」 所以我簡單直接就答『我無搵過妳！』 『無可能，有個你missed call喎...」 我今日心情不錯，所以無cut佢線，仲反問佢『妳搵我咩事？』 『唔係你搵我咩？你搵我咩事？』
已經俾左一次機會妳，妳仲黎！Bye都慳番講就收佢線！

從前喜歡跟幾個朋友入馬場，但賭仔姓賴，輸左錢實話發起入馬場那位『最衰係你，無端端叫咩我入場呢！』所以永遠無人肯打電話約局，但大家偏偏又大鋪癮，我就會用呢個方法，打俾朋友『喂！你搵過我黎？搵我咩事？想我陪你入馬場呀？』 後來這個方法使用於朋友間約其他約會中 『喂！你搵我過黎？搵我咩事？想我陪你睇戲呀？』 『喂！你搵我過黎？搵我咩事？想問我借錢呀？不如你借d俾我先啦！』

同情人炒大鑊之後，冷戰左個幾星期，唔甘心認輸打俾佢，但又好掛住佢，都會用呢招 『喂！你搵過我黎？搵我咩事？無搵咩？咁你係度做緊咩呀？』 如果對方亦已經嬲完，就會肯繼續同你傾落去。

我試過好耐無打俾阿媽，有日佢都用呢招 『喂！你搵過我黎？搵我咩事？無搵咩？你呢排好忙咩？』

基本上，『你搵過我黎？』可以係一句好可愛開場白，就算聽果位唔受，都未至於會反感，但如果你試過因為用呢個開場白，而被對方cut線，我估對方一定好憎你，好唔想同你講野，醒目D，唔好再煩人啦！