From the bottom of my Beach

朋友基斯甸說「你唔駛日日up-date個blog，你成日寫到水蛇春咁長，隔日易消化D！唔駛咁辛苦丫！又無錢賺！」
「喂！做開gym邊有得停架...何況...我真係想dum我班老友開心！我係真心架！」
我朋友話以後嘔唔出，只要想起我剛才所講的話，真係胃都嘔埋出黎！」
「我真係真心！」

這裡的話事人，我的好幫手angela話「灘！我肯定十日內你個blog會過十萬人次！」
「如果我而家停寫，會去到咩數停止再有人上黎呢？」
「d人會日日上黎等你再出新野，就算一幅相，一粒字都好！」
「嘩！妳咁講想dum死人咩？！」

上星期係尖沙嘴citysuper food court，我講緊電話，但有個女仔照走埋黎係咁「喂」我，我見到咁緊要就收線聽佢想講乜啦！ 「梨fog..計！」 「下？！係估咩架？！家庭用品？」 「梨fog..計！」
我膽粗粗去拆解佢講的說話！「你係咪想話....你個blog好睇！」 「我咪話..梨fog...計..羅...」
「....哦....係呀...thank you....」我個「橋」音都未發出黎，佢就走左！

尋日係九龍城，有個人走埋黎係咁笑，然後話「你好野....我有睇你個「薄lock」！好惹笑！」
「阿叔！你真係有睇！」 「X！你睇小我五十幾歲人唔識上網呀！我係唔識，我個仔開俾我睇丫麻！佢介紹我睇個薄lock架！你條友！睇唔出你唔係人面獸心下！「阿叔！你讚到我咁！我真係開心，從來d人都話我獸面獸心！」 「哈哈哈！你條x樣真係好x過癮！」

係「無心插柳」我會「受寵若驚」！不過「苦心經營」我就會照單全收！幾時過十萬無所謂！我辛苦小小更無所謂，寫blog本來我當係做gym，每日鍛練下個腦袋，抒發下！慢慢我同大家不經不覺建立左一種far away so close的友誼關係，有時看見你們的留言，給我「訴苦」email，每一字，每一句都係我每日起身，放工後的「精神食糧」 THX！
更加開心是，看見你們寫給我的東西，有文有路，絕非新聞組的思覺低劣水準！但你們肯打一封如此長篇的email給我，我已十分欣慰，因為你們還肯去寫字，肯去用腦！所以我幾忙，都會給回覆，當然如果你說的東西太離譜，幼稚......我就可能睇兩行就算！但我相信我班老友並唔係如此質素！
總之有咩唔開心上黎玩下，都唔掂就留下言，想私人d就email俾我（unklebeach@hotmail.com）

光明定黑暗，係掌握係你手裡！ cheers`~