「包玉剛係做咩架？」 「我知！係賣大包！」 「Li 阿娘就賣包，包玉剛係賣浴缸架！」
摘錄於電影「我愛扭紋柴」 黃秋生同村長周潤發的一段對白
每個人都有「如果我第時有錢，我會買的東西」，有人愛大屋，有人愛名車，有人希望酒池肉林，我只希望有一個岩我SIZE的浴缸！
沖涼對我黎講並不重要，只是需要，而需要是因人而異，有人一日沖三次涼，有人三日先沖一次涼，我兩樣都試過！寫開稿，真係三日三晚唔沖涼，唔剃鬚都試過，細過試過失戀，訓左係梳化幾日唔沖涼，唔食野，阿媽終於忍唔住出聲「你咁人地都唔知架！」呢場戲我放左落「初戀無限TOUCH」，但有時係屋企無聊，會一日沖三、四次涼；不過對我黎講，無野舒服得過浸浴缸，呢個狀態，呢個空間，係我創作泉源！
係香港要搵一個六呎長浴缸，除非你訂造，否則基本上係無可能，但我並唔係想要一個好豪華，九十幾種功能又按摩，又水療，又有水吧，又有音樂，可以護膚，醫埋肚胃，爭D可以做埋水力分勉！總之可以俾我成個人浸晒落水裡面，靜靜地思考一下就夠，但偏偏我覺得簡單的東西，就到而家都未俾我碰到...
其實都係爭半呎左右，我每次總會問，點解咁都唔俾埋我，好！我就要努力搵埋果半呎番黎！但其實只是雙腳微曲就已經解決了問題，點解要執著果半呎呢，莫非真係一吋長，一吋強！如果係身話，我要搵果半呎，唔係個浴缸長度，係心胸的量度，思考的深度，包容的厚度，呢個先係我從浴缸參透出來的態度！
9 comments:
Take it easy la uncle Beach
"心胸的量度，思考的深度，包容的厚度" is too difficult to find one n also too difficult to be one. n most people think they are actually.
"執著果半呎"是一種推動力，滿足現在是怏樂、改變現在是進步。要從快樂中進步，就要靠"執著"去推動了！
我唔鍾意用浴缸, 可能覺得又浪費水, 又容易跣倒...都係花灑好d...
浸浴真是人生一大享受呢, 誰不想有個大大的浴缸, 我很喜歡一邊聽嘩嘩嘩, 現在的她她他, 一邊浸浴呢~~爽!!
你講起浴缸我先醒起原來我屋企係有浴缸架~~不過我好似冇試過善用過佢~~~完全冇浸浴~~~
早排睇日本雜誌, 講d減肥0既方法, 原來每日浸浴1-2小時, 1個月可以減成5-7kg~~~
我6月0個時同自己講, 等自己冇咁忙, 7月開始試0下浸兩個月. 睇0下9月會唔會真係減左磅....但到今日7月18號, 我先醒起唔記得呢回事~~~覺得自己真係好失敗~~~失敗到每日都企0係浴缸沖涼洗頭都唔記得自己屋企係有浴缸~~~
浴缸姐姐, 對唔住呀~~~
"心胸的量度，思考的深度，包容的厚度"...
心胸的量度: Don't take things personal, don't calculate others
思考的深度: Listen from others, learn from others, Give yourself sometime quiet and alone and rethink what you do today.
包容的厚度: Don't expect too much, learn how to forget and forgive...
Matt, This is what I learned from my Granduncle. Hope you understand what it means.
Goodluck!
洗澡時最能令我清醒 ^_^
我都想要一個大浴缸....
Post a Comment