假日迷思

飯島愛之死，我半點也不震撼，但飯島愛之死，竟然可以上港聞頭條，仲要揀係一個大節日頭版，就變成了我這個假日的迷思！

安迪窩河講過「每個人都可以成為幾分鐘明星！」，飯島愛生前有幾紅，都仍然係小眾另類明星，點都唔會及佢死後今日咁紅，至小你完全唔知佢係邊個，今日見到報章咁大個字，無興趣問人佢係邊個，但佢始始終係你腦海停留過，我相信佢生前點叫點做點博命，認識佢，記得佢的人，都不會及今日多....
我從前有個劇本，臨門一腳因演員問題開唔成，戲名叫「製造明星」，我劇本的封面寫著「明星.....是製造出來的！」，下面加多行借用了鄭秀文 〈星秀傳說〉的一句歌詞 「EVERYONE is SUPERSTAR 」，後來這個劇本故事不停走過無數電影公司，到最後我聽到關於她的評語是「現在還有明星...還需要明星嗎？」
捧出一個明星，動輒要一千幾百萬，還不保証一定成功，現今瞬息萬變，幾年捧一個SO CALL 明星出來，倒不如一年內捧幾個用完即棄的偶像出來，既化算，回報率可能更高！要捧名星，等死了之後，為她或他大造文章，身世有咁慘寫到咁慘，遭遇有咁坎坷得咁坎坷，要讀者去尊敬、歌頌、愛戴被製造成「生前時不與我，死後才得到認同」的〈無奈巨星〉，或許你明天已經忘記，但她或他這一天始終是星途最爛燦的一日！
我們要感謝傳媒，讓每個人亦有希望成為明星，有機會上報紙頭條，更感激的是你們讓我知道 「我們可以這樣看待生命！」