溜溜廢廢

溜溜廢廢點解？
我細個住荔景村，外婆住美孚，我成話去探佢，陪佢住佢屋企，其實係為左方便去荔園同保齡球場玩，我同外婆好鐘意互窒，我唔夠窒就傻笑，亂講野，碌地，外婆就會話「阿光！你溜溜廢廢咁，大個點算呀？！」
呢個例子，溜溜廢廢解「胡鬧、輕挑、唔成熟」
大個左，我成日漏帶鎖匙，要去美孚取後備匙，外婆就會話「阿光！你咁溜溜廢廢，出黎做野好蝕底架！」
呢個例子溜溜廢廢解「操心大意，難成大器」
到我開始做演員，扮鬼扮馬搞笑，外婆就會話「阿光！你成世都溜溜廢廢，岩晒做呢d野！」
呢個例子溜溜廢廢解「有喜劇感，夠騎呢，錯有錯著」
鐘意點解，鐘意點用，適隨尊便，真正解釋只有外婆知道，但一直無問，相信以後佢都答唔到我！
外婆舊年中風後，活躍老人急轉直下，其實佢都算勁，生左七個，我阿媽係大女，亦都係傳說中的大姨媽，外婆幾年前患癌可以捱過無事，呢一次終於要抖抖了！
今晚佢八十三歲生日，總動員為佢賀壽
「外婆，阿光呀！溜溜廢廢果個呀！」
外婆捉住我隻手「唔溜廢，阿光唔溜廢..」
我想......呢個溜廢應該解「溫暖」
外婆感觸落淚，然後全靠我以「溜廢表演」，令外婆破涕為笑
一家人溫溫馨馨，開開心心食左餐安樂茶飯
金雕玉砌，又點及溜溜廢廢
離開時，舅父約我去德國睇世界杯，好想去！