BirmingHAE

去倫敦，直航十二個鐘機程，零晨上機，飲飽食醉，兩點前訓得著，順須利利訓到七八個鐘，起身睇兩套戲，打一陣機，食多餐就到

去伯明翰，無直航，要先飛八個鐘杜拜，零晨上機，兩點先派餐，食飽飲醉，順順利利都要四點半至訓到，何況機上面有初生小生命，佢一日未訓，你就算訓著都一定會被佢超高分貝的喊聲嘈番醒，終於我睇兩套戲，打一陣機，個小生命終於喊夠，我可以放心訓，機長就宣佈即將落機....

去到杜拜，又要等兩個鐘轉機，個機場大到成個杜拜咁大，但竟然可以無辦法搵到張凳攤抖下，終於我放棄「就死唔搵唔到位！」呢個幼稚任性羅苦黎辛的無謂信念，決定坐地下，其實係決定唔理咁多，係地下訓一陣，此時機場宣佈「由於接送往飛機的穿梭巴士出現問題，希望客人提早登機，於是我dee了一聲，然後又爬起身去排巴士，搞左半個鐘終於上到機，我一望自己個位，開心到笑左出黎，坐係我隔離位係一個樣子身材都相當不俗的女子，我知道跟住個七個鐘我應該唔駛訓，因為佢抱住一個細路，仲係傳說中「又扭計，又百厭，又成Q日放聲大喊.. 」果d討Q厭細路，其實呢種細路應該列入危險品，不准攜帶上機！終於我犧牲連埋DELAY，大拿拿八個幾鐘睡眠時間，去鍛練自己的EQ及忍耐力！仲試到我一把年紀，但依然好捱得眼訓！






經過二十個鐘的折磨，我終於來到伯明翰，出機艙感受到的第一啖寒氣後，我知道為了這啖「英國味」，再辛苦也是值得的；過關的時侯，女官員問我來伯明翰什麼，我當然好行咁答「觀光旅遊」，女官員有點錯愕「有特別要去觀光的地方嗎？」我見她有點不相信，就直接答我是主要來睇波，女關員繼續追問「那兩隊對賽呢？」，「伯明翰對熱刺」女關員再問我支持邊隊，我左顧右盼，低聲地告訴她「我其實是來捧熱刺！」女關員放聲大笑！我連忙解釋我是只是講笑「其實我是維拉的FANS！」女關員笑得更利害，呢次我係二十年來，第一次係英國入程是開心歡樂，而呢個美好片段就發生係伯明翰，我點會對呢度無好感喎！







而事實上，伯明翰都無乜值得你唔鍾意，因為伯明翰根本就乜野，所以難怪女關員會質疑我是來「觀光」 ，伯明翰一眼真係睇得晒，但我真係鍾意呢度 !!


因為咁無野的地方，你就可以好盡情咁hae!!





有人問我「咁遠走到去，留係酒店唔出街，你過去為左咩？」「我為左離開香港！」