忘了.忘不了

最近我開始久不久就丟走d儲左好耐o既物件，如果有「有心人」喜愛的話，我就會送晒俾佢地，就好似儲左好耐d火機，今年GATHERING全部送晒俾我班「老友」，最近開始送書，送CD，衫如果仲新就羅去阿WING（妹妹妹妹）個二手店賣....

我咁做一來係想屋企再簡潔d，二來要學習捨棄，不要以「儲左好耐唔捨得丟」做籍口，放晒d物件放係度，其實根本呢世都唔會望一眼 ！

而每次「丟野」，最恨心丟去的，就是舊相片，那些面容，那些過去的色顏，每次重看總令人尷尬難堪，但我發現，當你丟去（撕碎）一張相片，那一張相就永遠留係你心裡面...

「如果不是仍在心，就不用去忘記~`」


有些事、景、人，我仍然很掛念

我以為自己已經忘記，原來曾經染到個頭咁「肉酸」，這是上次到 蘇梅 full moon party的其中一個上午，一大班人出海，臨上船，有人會為你拍照，回程時「已」製成瓷碟，你唔買個樣就永留係蘇梅，即是 你係蘇梅多左個「骨灰龕」

那一次是我人生其中一次最好玩，但唔會再發生o既旅程！我全程一幅相都無影，之後亦沒有問朋友取回一幅相，一切在我心裡面，永遠不會忘記...

奇怪的是，我幾時有將呢隻碟放入書櫃到！呢次我真係忘記，無法想起~~

呢張相就更加無法想起係幾時影，更加無法記起，我幾時試過，同可以留到咁長頭髮！後面伸晒利果個就係ANNCHOI，呢張相應該有十 五六年歷史，嘩！好驚~~



驚開就繼續落去，下面呢張無十八，都有十九年前，唔係我二十一歲，就二十二歲生日，正所謂「果日要開工，生日係片廠過！」 你睇睇果時我同ANNCHOI個樣掂到，仲有「怪獸哥哥嚴秋華」，如果你同樣講緊呢句說話，我請你食餅，咁梗係食老餅啦~`




梗掂都係，再返去早多幾年，應該有二十一、二年歷史，我努力去想，我應該是在「ESPRIT」年代渡過我的十八歲生日，而呢班一定係當時同事，所以呢張相聲該係二十一、二年前影

我又唔記得乜我曾經會 攝 件衫入褲，仲要攝到咁入，咁實，仲好似有條吊帶係度，呢位哥仔，你其實想點？！

我一直以為忘記了呢幾位當時SO CALL傾得埋O既「好朋友」，但呢一刻我放這幅相上來，動機好清楚，Johhny、Kent Wong、Dora鄭惠芳，你或你的朋友見到相，留個字給我吧！





十八歲生日係同Esprit的朋友過，咁下面果張又係幾多歲生日呢？


我真係無辦法想得起，睇條褲高腰到咁，闊到咁，睇D人D髮型，十五？定十六歲？係咁上下啦，張相我丟左，登上黎只希望相中人話我知，點解同係邊度有件咁奇怪O既事發生過~~


最後一張，我無辦法記起發生過的相，位置應該是什麼「XXX渡假村」，以前一班少男，係去呢D地方玩，呢方面我是記得，但我無辦法想起，我個腰包是什麼意思，還有在旁的手巾仔，是否同性戀者吸引同性的暗號，這個埋藏左二十五年有多的謎團，有邊位可以幫我解開~`



把相傳給ANNCHOI的時侯，佢大力（佢幾時都係大力）建議我今年搞番D野，入行二十年，同四十歲人喎，我的答案是「睇到時有冇MOOD先啦.....又一事無成，有乜好回顧？！」 阿ANN叫我熱情D，試下「真開放」，佢話至小都搞個「童年時」相展，呢個我有興趣，但更有興趣是聯同其他的人一齊搞，收集最值得展示出來的「童年照」，一齊搞個相展！ 如果你面對到最前，仲肯拿出來給其他人看及笑，請第一時間報名