齊學擺鋪

我認識的明星中，擺鋪皇一定是吳鎮宇，挺胸收腹，雙手輕插褲袋，側身回首，堅定凌勵眼神，收緊的嘴唇，令面頰更感嶙峋，更有男人味！觀眾的目光是他的收視率，閃光燈是加冕的光環。

大家就試下跟以上程序，對鏡做一次，如果你做足但唔嘔，仲覺得自己有型，你咪以為咁就可以挑戰擺鋪皇地位，做一次梗係易，你試下一年三百六十五日，都處於呢個狀態，仲日日都唔嘔，仍然覺得自己型，咁你就有可能係新一代鋪皇。

扮型擺鋪並不是最難，最難是影硬照，但主題係搞笑，又或者係開心d、熱鬧d...個攝影師會不停同你講
「開心d、好笑d、得意d、搞笑d、趣怪d、鬼馬d、搞鬼d、賤格d、衰鬼d、淫dd、黑人憎d、慘樣d......」

大家又試下跟以上程序，對鏡做一次，不過限時三十秒，仲要每個表情做三款不同，如果你試過覺得自己得，咁你入到複賽，請你在眾目睽睽下，重新做一次，限時三十秒，但如果做完一次，圍觀的板口板面，一d都唔想笑，請你再做多次，因為何為收貨，就係要聽到有人笑，同好興奮話「咁咪好笑羅！」

但每一次聽到呢句，心裡面都會覺時好難受，原來自己最唔喜歡的表情，是人家最開心的東西！

扮型難，扮好笑更難，乜都唔扮仲難

「自然d...放鬆d..做番自己得架喇！」

越想自然就越唔自然，越想放鬆就越緊張，迷茫究竟自己係點，最後就會換黎一句 「你表情好生硬！」

三樣都難，做到其中一樣都好叻，如果你試完，做到晒三樣，記住留低個聯略俾我，我要我向你拜師！