西婷

第一次見西婷的時侯，她只有三、四歲，我是因為認識大她十年的哥哥，偶意到他家裡作客，問功課時，常常會跟可愛活潑的西婷玩耍，其實那印象已很模糊，但大多數小朋友都是活潑可愛，這樣形容錯的機會比較小。

一別二十多年，如今西婷已年近三十，但樣子仍然很年輕，看上去似二十五歲左右，事實上，西婷說話的聲線、語調、及至用詞，依然像個雙十年華的小可愛 「鄒凱光哥哥，吳君如姐姐幾時番電台開咪呀？」
我故作不滿 「家下夜夜開放好難聽咩？！一定要聽番吳君如咩？！」 西婷梨渦輕笑「你節目一陣先講丫，我想問吳君如姐姐幾時番黎開咪呀？」 「佢應該無咁快..」 「唔該...」 「咁妳而家可以講我知覺得我節目點啦？」 「我唔知呀？」 「妳照直講啦 」 「唔可以照直講....因為我都無聽過...」 我登時「哇~嘩」跌落地之際 「太夜...要訓聽唔到...」 「妳可以聽重溫丫！」 「係喎.....咁你俾你ACC我丫」

我笑住寫俾佢，覺得西婷好像被魔鬼污辱過的小天使，純品中滲透著一絲絲邪惡感，巧合的是西婷確是位白衣天使，護士工作對西婷而言，就只是一份工作而已，無需特別感情，愛心，完成職責就收工。

「有晚有對夫婦新婚，第一次洞房，丈夫之後下體流血黎求醫，我叫佢羅出黎俾睇下.... 我同佢劣個龜頭出黎... 哦.... 先生你包皮過長，做左手術先再造愛啦！」

試想想一個以天真可愛的表情陳述這件事，手還同時在比劃著過程，我可以點反應？！

西婷！妳係咪玩我！？

之後聽到她與哥哥的對話 「哥哥，我best friend嫁左個有錢佬，佢老公好快就死左.... 佢會仲有錢... 咁後生就發達！」

「哥哥，我份功課你二十號一定要做好！唔遲交得！」西婷哥哥是個學貫中西的專業人仕，哥哥肯定地回覆「十九號俾妳！」，我終於忍不住開腔「妳阿哥幫妳做master份功課？」 「唔係點pass到呀？！」 「咁妳master到都無用架，妳跟本唔識！」 哥哥插嘴 「做左都唔會識架！」 「呢個咩道理呀？」 「考master我俾錢架！」 「咁又點呀？」

兩兄妹對望一笑，同時擺出一幅「你係明就明，唔明點講都唔會明」的態度，再沒有跟我討論落去，而哥哥就倚在西婷的手臂小睡，突然，西婷不顧哥哥彈起身，不知從那裡找來一疊東西 「你有冇去過迪士尼？」 「香港冇去過！」 「點解喎！我去過五十幾次，我九月買左個PASS，個個禮拜都去」

西婷喜孜孜展覽她的珍藏迪士尼襟章時，她的可愛純真，把之前的邪惡感全洗去，她不是魔鬼，也不是天使，但只是一個她希望「最好死係迪士尼，唔得都要係迪士尼搞葬禮，D骨灰放落煙花到射上天！」的簡單可愛妹妹。


離開時，西婷甜到漏入梨渦的笑容，輕輕揮著手「鄒凱光哥哥，你知道吳君如姐姐幾時番黎開咪，話俾哥哥知... 哥哥，你知道要第一時間話我知」 西婷以無法抗拒的懇求眼神望著我，「有消息第一時間通知妳！」 「thank you，咁我以後捱眼訓聽一陣你節目啦」

「真係多謝晒！」

不過西婷，我估妳要有排等，亦都希望妳聽得多我節目，會慢慢愛上~ Yeah~~