就咁睇呢幅相，你會覺得好紅，所有襯晒色！第一時間要你答幅相係邊到影，你個答案係咪「去飲果時影羅！」
幅相其實係九展影！睇見係咪為之「哇wow」呢？
什麼是「哇wow」？每當我們遇到一些事情，不懂反應，啼笑皆非，用「吹漲」又好似嚴重左，就會用「真係為之哇wow！」 呢個配樂係卡通片常有！都唔明就上「都唔知好嬲定好笑」架車啦！
我喜歡遇到令人為之哇wow的人與事，有咩奇妙得過你明明嬲但竟然笑左出黎丫！真係為之哇wow架！
早排去書展，有個肥仔問我「你係咪做她他她果個鄒海灘？」 「我係！」 「我無聽她他她好耐lu！」 「嘩！你叫我就係要話我知你無聽？」 「我坦白丫麻，我好鐘意聽你做節目架！不過而家真係無聽！」 「咁你鐘意聽但係又唔聽，你其實想點先？」「鐘意聽但唔一定要聽o既，總之你比心機d啦！我真係好鐘意聽你做節目！」 肥仔講完就走左去，我企係度，心裡已替自己配樂 「哇 wow~~~」
我係台灣拍「一個字頭的旦生」，有個樣子娟好的少女，手持紙筆，一臉靦腆，儲左好耐勇氣，然後走到我跟前，遞起紙筆給我，我雖然受寵若驚，但仍保持冷靜接過少女紙筆，正想簽名的時侯，「你可以幫我找劉青雲簽名嗎？」 起配樂「 哇 wow~~」
劉青雲係日本同我拍「七年很癢」時，曾經有兩個日本女仔問佢「可唔可以幫我地影幅相？」 青雲好有禮貌答好，然後走到兩個女仔身旁，點知個日本女仔俾部相機青雲「哦~~幫妳地影幅相！」 青雲忍住笑拿起相機同佢地影！ 配樂又起「哇 wow~~」
我試過開工住酒店，第二朝七點要開工，一早訓，點知兩點幾俾隔離房開party嘈醒，我打電話落大堂求助，無耐之後，隔離就靜左，我心想，呢間酒店做事效率真快，所以我好快又訓得番，點知個幾鐘頭後個電話再響起！「先生！頭先你打電話俾我地，話隔離房好嘈，我地已經去同佢地反影左，唔知佢地而家仲有冇嘈呢？」
起配樂「哇 wow~~~」 「無嘈~~點夠你嘈丫！」
係澳門食飯，我叫身後的待應「唔該！請問有冇茄汁？」 「有！」個待應答完我繼續企係度！十秒後「我要呀！」 「好！我羅俾你！」 配樂又起「 哇 wow~~~」
同個女仔係寒冬行街，個女仔有點冷，我拉拉外套，個女仔見狀「喂！我唔凍.....」，未講完先發現我原來只是拉起拉鍊，並非除外套給佢！配樂起，兩個都為之「哇wow~~」
其實爆裂刑警內，羅蘭姐羅碗麵出來，然後好似俾古仔「要唔要呀？」古仔點頭 「自己煮丫」，呢場咁「哇wow」的戲，前身來自當時喜歡去飲野，問女仔「要唔要野飲？ 自己買丫」我一見到佢地黑面，我就會「哇 wow！」 好開心！
面對難題時，橫豎發脾氣都解決唔到，倒不如說聲「咁大鑊！呢次真係為之哇wow喇！」
俾老細鬧，下屬害你咩鑊，情人對你無理取鬧，遇到任何唔開心東西，試下講句「真係為之哇wow！」，然後傻笑一陣，我肯定心情即刻會好番！我想起各位老友傻笑個樣，已經忍唔住笑左出黎，多d人做，多d笑容！ 哇 wow~~
19 comments:
That's true man!! There's alwayz alot of "哇 wow" things happen around us.... especially in restaurant, office....
您似乎對格仔恤衫有份獨特情e結喎 : )
you know what, I am in a very bad mood few minutes ago. But after I read this, it made me happy. WOW. Thank you, Unkle Beach. Thank you for cheer me up.
哈哈，好多爆笑位播！
同樣情況，我會用Uh-Oh（丫噢）囉！哈哈。
有次老闆唔知做咩賴野我好大聲Uh-Oh左（驚），冇事！
Uh-Oh.
哈哈哈哈哈......."哇wow"
你果d哇wow事件都幾好笑...XD
我記得”為之哇wow” 係在你地節目聽番來的呢..
其實到依家有好多掛在我口邊既單句或四字詞都係在嘩嘩嘩or她他她聽番來…
好似”起身叫傑仔” 呀, “稀疏平常”等, 數之不盡…..全都變成我日常生活同朋友溝通用的句子
”為之哇wow” 我就好少用到…但睇完灘叔你咁講..我諗我都要try 下下次面對難題時用多d呢句..
hahahahahaha
that's all i can say
>v<
幾好笑喎..哇woo = ]
佳 作! 笑 爆 嘴....
哈哈~~~ 現實生活中既野，住住係最吹到你啤一聲又最好笑既~~~
睇你個 blog 唔係好耐，睇過既呢個最好笑`~~~ 多謝分享~~
This is a good prose with many interesting examples, talking about the embarrassment of
misunderstanding between people. As the prose is written in book language, it is more inspiring.
睇你個 blog 唔係太耐~~~ 呢個最好笑~~~
現實生活中吹到你啤一聲既，住住最好笑`~~keke
多謝分享
如果係你有囍就好, 不過真係到你時你會唔會著到咁呢?
勾起我一件陳年事- 當時氣氛僵到唔知點收科，空氣好似凝住咗。突然我地呢邊有人咭聲笑出嚟，真係哇WOW。乜氣勢都無晒。
哈哈 ..
有 d 被玩的 feel .. xDDD
看第一張相, 覺得你似路過多於出席喜宴。
你平日去飲, 會這身打扮麼 ?
真係好笑! 哈哈
「幫妳地影幅相」估唔到係真人真事啦! 哈哈
仲希澳門O個個都係一絕啦!
多謝你令大家開心! :p
有一次係酒樓食晚飯, 經理剛好行過, 我地想叫佢寫野, 就舉手...
點知佢同我地揮手, "hi", 之後行咗去...
「 哇 wow~~~」
Post a Comment