Monday Reminders~`

It was a long, dark, sleepy morning walk.

You fell down, case and point.

It was a Good Start``

It was a Good Start``

問心

各位不同年紀女仕們，如果有一晚，妳飲大左，有相識不久的「佢」（圖中那位）抱妳返房，溫柔地放妳落床，手指慢慢為妳的太陽穴按摩....然後手開始移到妳身軀上，在妳重要的部位附近徘徊....然後「佢」低頭在妳耳邊輕輕的問「舒服嗎？」
未待妳回覆，「佢」開始吻向妳，然後......


問心果句，如果係「佢」借醉搞妳，會接受嗎？

武得揀與吳識揀

我曾經試過在一間日本餐館點菜，發生以下情形，一個年青男經理，永遠同時間要處理六件事情，落單時叫其他伙記帶客人埋位，又要幫其他檯追單，同時找錢俾左邊張檯，及幫右邊張檯埋單，仲要唔夠十秒就要撥靚個髮型一次，基本上，搵佢落單都知道會麻煩，但估唔到係煩到咁

「想食D咩？」

「魚生有邊樣靚？」

「樣樣都好靚！你想食咩？」

「邊樣最靚你介紹下丫」

「真係樣樣都靚喎，你想食咩？」

「我想食最好果樣！係邊樣丫？」

「呢度樣樣都咁好過喎，你想食咩？」

呢個位我開始有火，其實都算好耐性
「你係咁話樣樣都好，咁即係點呀！咁我即係要晒樣樣呀？！即係雜綿魚生呀？！」

「就雜綿魚生啦！乜都有，食過邊樣好食咪再ENCORE羅！而家唔駛傷腦筋丫嘛！」


我想揀！點解要全部俾晒我！

最近看到一位男子探訪有錢友人的遭遇，男子坐在大廳等待朋友，樣子端莊，態度盡責的女傭走近
「先生！想飲D乜？果汁、汽水、茶、咖啡、水同酒都有」

「我要「茶」，唔該！」

「要咩茶呢？我地有Ceylon、Earl Grey、Camomile、Gasmine、Indian tea, Herbal tea, Bush tea, Honey bush tea, iced tea or green tea? 普洱、龍井、水仙、香片、鐵觀音、烏龍茶、功夫茶、潮洲茶...」

「...我要杯咖啡得喇..」

「要乜咖啡，Latte、Capuccino、Frapuccino、Mocha、Americano、Espresso、Blue Mountain、Vienna Coffee 、Spanish Coffee...」

「我要杯regular coffee得喇！」

「咁要凍定熱呢？」

「熱！」

「加奶嗎？」

「加」

「要高脂高鈣奶，定低脂高鈣、亦或低脂低鈣，還是高脂低鈣奶？仲有花奶、羊奶、煉奶....」

「我都係唔駛加奶！」

「要sweetener, sugar or honey嗎?」

「Sugar唔該」

「Beet sugar or cane sugar?」

「Cane PLEASE！」

「White, brown or yellow sugar?」

男人火起了
「妳俾杯水我得喇！」

「好！要有氣定無氣？有氣有soda water、Qvarzia、Perrier...無氣有 Evian、Volvic、Vittel、Saint-Gervais.....」]

「我！只！係！想！就！咁！要！一！杯！清！水就得喇！」

「好！礦泉水、蒸漏水定水喉水？」

男人火起到想要「火水」來向女傭噴火，此刻，男人的朋友亦步至大廳

「唔好飲水啦，不如飲酒丫」
盡責的女傭立刻開聲
「想飲咩酒？紅酒、白酒、香檳、威士己、啤酒、Sake、Volka、tequila、Martini sweet、dry、bianco、GIN、五烺液、女兒紅......」
男人唔敢再揀
「你決定丫！」
我唔想揀！點解要全部俾晒我！

Physical~`

看罷 J W的演唱會，我跟朋友說「不知何解，我不喜歡...但觀賞過程是稱心的..」，朋友說「因為你怕懷舊！」
「Physical」、「You spin me round&round」、「Material GIRL」、「Vincent」、「玫瑰玫瑰我愛你」....我有能力講得出，唱得出每隻歌，証明絕對係我年代，感覺已經好唔自在，然後仲係一個二十歲少女，用把成熟又有韻味o既聲音唱出，仲唔係從前「金鳳凰酒廊」，駐場歌手：〈青春少艾，樣靚聲甜，情歌公主~李麗霞〉 再加上隊Band 〈音樂造詣極高，但心態只係打份工〉o既演出，環顧四周圍睇得入神o既觀眾，我差一點想叫杯fruit Punch飲，同寫紙遞上台點歌「禪院鐘聲」....是否時空交錯，把我送回從前的年代，我是現代人，我唔是返去從前！
朋友聽罷我發牢騷後，再輕輕拋下一句「唔好聽羅！聽飛輪海吧！」，「都唔聽！我聽尹光！」 你有飛輪海，我有爆金爛！既然要倒退，我就退到自己最不喜歡的時侯，橫豎都要受苦，被折磨倒不如自磨！但這一切都是我一廂情願的錯誤想法，離場時，兩位年輕少女告之我「真相」！

少女A：「頭先果隻〈PHYSICAL〉係咪舒適堡廣告新歌？」
少女B：「唔係掛，Aaron都無唱過！」
少女A：「可能下隻碟會唱呢！唔係點會有隻叫〈PHYSICAL〉喎！」
少女B：「咁又係.....」


潮流如季節，季節就似人生，人生就是一個循環，「過去」是跟我們反方向走的球體，當離開到最遠的時侯，過去又慢慢走到現在，舊東西面對新人事，變得新奇可愛，舊人事又可以繼續愛舊東西，而不怕被取笑「太懷舊」，因為舊東西都變成新時興！正如五十歲的BARBIE也可以再到中國打新工！

「Lets get Physical！」從前是禁歌內意淫的一句，如果Aaron翻唱，就可以變成「Lets get Physical.... membership for Free！」

大家同我做証，呢條橋係我諗先架！

灰底

嘩！正！等呢場雨好耐，無呢場雨都沖唔走d春霧！然後周末轉涼，仲可以著多次d厚衫去街！嘩！諗起都開心！
唔夠開心點有力做工喎！












有冇發現，當所有野灰晒，你會好容易見到顏色！你睇件衫隻藍，泳池個藍，屋企個綠，大廈個黃同磚紅，無論幾大雨，都依然好顯眼。
所以記住阿灘格言


〈越灰底，越多顏色睇！〉

yeah~`

消 色

即使外面是多灰陰，我們的世界仍然可以有很多色彩！

「如果無左一隻顏色，你會揀邊隻色？」，或許我太好色，根本揀不到可以捨棄的顏色！真係非揀不可，我就會揀「紫色」，因為我只見過一個人carry到紫色東西，但這人已經離開了很久，所以我認為「紫色」唔應該再係世上存在！

你最想唔要的顏色，又是那一隻？原因又是什麼？你每留低一個答案，這裡就那一分色彩~`

藍男自語

藍未必一定代表憂鬱，藍可以代表美麗，代表明亮，代表生機，代表春天....Blue monday也可以美麗又明亮，像春天一樣充滿生機！ 〈Moody blue！such a fool！〉

姊妹

金小姐與芷蘭相識多年，情同姊妹，芷蘭要結婚了，作為金蘭姊妹，金小姐得悉喜訊後，情緒比芷蘭更激動，緊抱著她，哭笑難分，以外星語向芷蘭送上多個祝賀，那一刻，金小姐心內有一句話，始終沒有說出口；芷蘭輕拍金小姐的背，除了說「多謝！」外，再找不到其他說話回應，但見金小姐良久亦未能平復，芷蘭故意問了金小姐一個明知故問的問題，「妳做我伴娘喎！」，金小姐聽罷，哭得更利害，笑得更大聲，心裡又另一句，始終沒有說出口！
芷蘭的婚禮越近，金小姐的情緒就越亂，直至要試伴娘衫的前一晚上，金小姐終於按捺不住，找了好友阿灘訴苦，要把心裡面那兩句話說出來！起初阿灘是抗拒的，因為阿灘是怕承擔的人，怕知道人家的秘密後，要承擔守秘密的負任，但永遠都是別人比自己，更清楚自己！灘高一呎，金高一丈！在阿灘往應金小姐約的途中，她已先下手為強！阿灘冷不提防打開她的短訊，無可逃避地分享了她的秘密，第一句她藏於心裡，沒有跟芷蘭說的話 「我可唔可以唔做伴娘？」
阿灘看罷，腦內已轉出多個「唔做姊妹的因由」，準備以其人之道，還治其人之身，妳未開口，已經說了妳想說的！
「芷蘭的丈夫，是妳的前度男友！」
「不是！」
「妳已經做過兩次，怕中傳說中做過三次伴娘就嫁唔出的魔咒！」
「也不是！」
「睇相佬說妳今年不宜做伴娘！」
「亦不是！」
「妳果日自己都要結婚，要做新娘，做唔到伴娘！」
「絕不是！」
「其實妳是男人，所以應該做伴郎！」
「都不是！」
阿灘越估越驚，緊張下忘了還有一個因由，但說時遲，那時快，金小姐已經把因由，連同沒有跟芷蘭要說的第二句話，一拼說出來
「伴娘的衫好Q核突！我唔想做伴娘，就係唔想著果d核突衫！」
金小姐把心底話說出後，整個人鬆了一口氣，而阿灘就站起來，走到金小姐面前，擁抱她
「我以為我心腸唔好，又無事生非！我一直想問〈點Q解伴娘及姊妹d衫咁Q核突？！〉」

能夠找到志同道合，是一件很動人的事情！

就係因為呢個因由，所以阿灘不愛去婚宴，亦謝絕做「兄弟」！實在難忍望見d咁Q核突的畫面！還記得很多年前，絕少做「兄弟」的阿灘，多年前因為垂涎朋友的伴娘，竟然請纓甘做伴郎，到大喜當日，阿灘嚇了一跳，原本明明脫俗得像出道時的Juliette Binoche，搞乜會變成後期的朱咪咪！要對住一整日，俾處死更難受，而好明顯問題都不在伴娘或姊妹本身，都是那身由印花窗簾布+透視窗簾紗，再加些小檯布，包禮物會甩粉的金線絲帶蝴蝶結，及狀似臭丸的小型珍珠，怕凍或怕肥的，仲會加多件夜總會知客必備的毛毛披肩，手上仲唔知點解要配多個花環，簡直是娘爆，然後再加令人一見難忘的化妝與髮型，再靚的美人亦會因為做姊妹或伴娘而變醜，所以別怪阿灘心腸唔好，當你苦思心亦無法解釋 「點解姊妹同伴娘的打扮咁Q核突？！」，你只會得出一個結論，就是新娘子刻意整醜身邊的人，來顯得自己突別靚！

金小姐垂死掙扎，願意以任何代價，得到一條「唔駛做伴娘，又唔會得罪芷蘭」的絕橋，但阿灘才華有限，雙贏局面的絕橋真的無法提供，但「免除伴娘姊妹團穿著核突制服」的屎橋，阿灘仲有貨賣，信者得救！
阿灘叫金小姐主動接觸芷蘭未婚夫，要他向芷蘭嚴正聲明，如果伴娘姊妹們穿著核突制服，就立刻取消婚約！金小姐對阿灘的提議感到啼笑皆非，覺得是天方夜談，但阿灘堅持這是唯一可以改變事實的辦法，只要金小姐及一眾姊妹堅持以性感泳衣，取代現有核突制服，芷蘭的未婚夫一定肯以終生大事來支持！
絕望的金小姐，竟然用了三秒分折阿灘提供辦法的可行性，「泳衣我實在無法接受！緊身高叉旗袍可以嗎？這是我最後的底線！」阿灘直斥金小姐天真且傻，就算旗袍通過，由於費用昂貴，係呢個時勢，根本無人願意承擔，只有性感泳衣，由於布不多，必要時上深圳訂造，十零蚊應該造到，再加上「伴娘姊妹團」著泳衣呢個咁大膽嶄新且革命性的意念，肯定可以得到大部份在野憤青、憤佬、憤坑、憤叔、憤伯訓身支持動議！金小姐竟然點頭和應，阿灘啼笑皆非！人在困惑無助時，真係乜都會相信！但相信又未必代表會行動！
翌日，金小姐與姊妹們如常試穿了那套核Q突制服，還交足戲，全程笑容滿面，情況一直相安無事，喜氣洋洋！但去到尾聲的時侯，其中一位之前一晚浦天光，唔夠訓又hangover的姊妹細卷突然撲起身，氣沖沖地走到芷蘭跟前 「Sorry！我頂唔順d衫，我幫唔到妳做姊妹！」 一時間，全場鴉雀無聲，唯獨金小姐情不自禁地拍了一下手掌，眾人來不及反應，細卷就繼續發炮「點解要扮到咁娘爆，我寧願著泳衣都唔著呢d衫！」金小姐正欲大聲叫「好！」，發現芷蘭望向她，金小姐立刻吞左個好字落肚，急轉為低聲不滿地說「有冇搞錯~」芷蘭問細卷想穿什麼？「我唔知，總之就唔係呢d核突制服！」，金小姐想點頭認同，但芷蘭又望望她，金即睜眉弄眼，手指指 「有冇搞錯~`」在這個膠著狀態下，冷傲的ICY兩指夾馨一支未點的香煙，垂著頭，聲線卻鏗鏘有力 「我識一個後生裁縫，專造去飲D衫，好靚！唔貴！有興趣轉頭覆我！一支煙時間~」，說罷垂著頭走出房外煲煙。這個時侯，各姊妹開始嘗試發言 「其實都可以試下....」、「唔貴又靚，我地自己俾番錢羅..」、「無所謂....都係為左賀芷蘭！」，而芷蘭亦承認「D衫係好Q核突！」，金小姐看著一眾終於落實找ICY的裁縫造靚伴娘及姊妹衫，感動到發了一個短訊給阿灘 「原來肯開口爭取，真係可以改變到事實架！」
以上是一個月前的故事，一個月後的今天，阿灘不停收到金小姐的求助短訊 「我唔做伴娘喇！姊妹們都話想唔做！」「新娘套衫都無咁麻煩啦！唔駛做工咩！」 「邊有人要個客減肥去就佢套衫架！」 「連ICY都頂唔順喇！」 「客人梗係有意見俾架啦！咁就覺得唔尊重，你係裁縫！唔係設計師！唔係藝術家呀！」 「而家唔係我地不滿，係人地藝術時裝師唔想造我地，劈炮走人呀！」 芷蘭的婚禮在十日後就要舉行，伴娘姊妹們還可以有什麼選擇呢？直至截稿前，阿灘收到金小姐的最後短訊是 「無衫著，最多咪著番之前果D核Q突衫，一日之麻，駛死咩！」

要革命成功，是需要無比的堅毅，但可惜我們往往遇到的情況是〈革命尚未成功，但同志已經無力！〉，所以我們依然要捱伴娘姊妹們的核Q突制服~`sigh`

戲子無情

失戀的人都是黐孖根的，甩拖的人說要學做戲，她說「戲子無情，以虛情假意騙取別人的真心真意，傷及無辜，總好過成為被傷及的無辜！」面對黐得咁有文路的人，千萬不能跟隨她思路，否則萬劫不復，隨時即晚要你帶佢上門找詹瑞文拜師學戲，所以一定要搞亂佢思路
「我怕妳無演戲天份，其實〈戲子無情，婊子無義〉，無義比無情更絕，妳不如考慮做婊子，學成的機會一定比做戲子大！」 她不但沒有欣賞我的幽默，反而面色一沉，咬咬唇，一臉委屈的自語「連你也看不起我！我怕我做錶子也沒客路！」
面對黐得咁又文路的人，千萬不能動了惻隱，否則萬劫不復！
「對！請不要拖垮婊子的營業額及整體婊子們的水準！」
她奸計未能得逞，咬著唇，努力地「谷眼淚」，可惜作為唯一觀眾的我，已經沒耐性等下去
「算吧！都說妳沒演戲天份！死心吧！」
她沒趣地垂下頭，無奈自語
「戲子無情，都不及觀眾無情！」
我不是無情，只是這些戲都看了很多遍，就算再好看，也會有看膩的時侯，更何況是不好看呢；情感世界內，我們都是戲子，只不過是演出什麼角色，熱戀時，就算你再沒天份，你都會演活全天侯二十四小時甜蜜幸福戀人，到失戀時，無論你正路演出失敗者角色，還是捨易取難去演看透情事堅強不屈的強者，你都是在演戲，又有幾多可以完全若無其事，繼續以平常心過活！說她沒演戲天份，只是我不想看這場戲，因為我知道好戲一定在後頭，愛情故事，都是千篇一律的.....
十多日後，我親眼看到她精湛的演出！我在街上親眼証實她已經跟舊情人再次撘上，我從遠處打電話給她，問她在那裡，她裝出緊張的聲調，與我看到她現實像食了春藥的樣子格格不入
「喂....我正趕著把一份開會文件拿去給老闆，又找不到他身處的開會地方...又急又煩！現在沒心情跟你談，待會再打給你......」
她壓倒性的演技，不但出色且極具霸氣，根本無俾機會對手回戲，一般情況下，呢個演出，已經可以大走對手，但好可惜她遇我這種老戲骨，又點會放過妳！她甫收線，我就猛然出現於她面前...都說好戲在後頭，她真正的演出，現在正式開始！
她在半秒之間，由甜到漏的眼神，轉化成凌厲懾人的目光，簡而清，壓著聲線，但強而有力的跟我說
「你沒有見過我！」
彷彿是通知，彷彿是命令，彷彿是向我証明她的演技！事實上她的演出確是精彩！
她說罷就當看不到我，跟舊情人遠去~`

戲子無情，其實都只因為情而已~`