6.30.2006

PERIOD



呢兩日心情開始差,可能突然無波睇,可能天氣太悶熱,可能工作並不如意,可能之前累積下來的疲倦,可能近排沒有刺激的事發生,可能....可能跟本是周期性,PERIOD到!
從前面對呢個情況,我會不停發脾氣,口口聲聲話「你地走開啦!我發自己脾氣之麻!」,其實咪又係發緊其他人脾氣!後來我學會匿埋唔見人,等PERIOD過!但逃避並不可能是最終的解決方法!應該去思考自己PERIOD到的原因,但情緒差會影響分折力,分折錯誤就會鑽牛角尖,無數解不開的結,就是這樣形成!
咁應該點算呀?心急人上
我發現有一種方法係可以把PERIOD提早結朿,就係「逆思考」!
被情人拋棄,你傷心欲絕,不停想自己不好的地方,越想就越無自信,越無自信就越醜樣,越醜樣就越無自信,越無自信就越去想自己的問題.....唔駛一個星期,你已經變成廢人!
轉反轉頭想,自己就算有一萬個問題,但仍比對方優勝!因為對方唯一的問題就是「無眼光!」,然後就離開呢個題目,因為再想又會返回上面的循環陷阱....
工作不如意,覺得自己有料,但唔識交際應酬,覺得咁做好假,好狗!調反轉想咪你所做一切都是演出,你是在角色扮演,扮演一個可以呃到個傻老闆的角色,無論你覺得點狗,點假,都是在演戲,你真身只會給最親,最愛的人看見!
我知道今天是A LEVEL放榜,很多考生今晚的心情都會忐忑不安,Relax~~`~~最壞咪出黎做野,驚唔夠學歷搵唔到工!好想繼續讀,但經濟又唔許可?係咁之嘛...做seven都係一份好好的過渡的工作,你係有心,邊做邊讀都無問題,再唔係做一年,蓄d錢先再讀過!你咁後生,我有個antie五十幾六十歲,最近先報名讀什麼英國文學,唔知咩學仕果d野咁啦....你地得果廿歲(其實有冇?)來日方長啦!
前面就算是盡頭,只要你肯回頭,大把路行啦!記住有乜想唔通,調番轉想就無事架喇!講下講下,我period完左lu,聽日去游水先!

9 comments:

Anonymous said...

咁我呢個period都好長.....
希望大家都快D好番啦!!

Anonymous said...

unklebeach

不要給自己太多籍口, 你應該比一d華南影帝or影后激親, 這些事我也經歷不少, 但應反過來看, 你該欣賞他們的演技及檢討自己的不合群or不埋堆, 這樣你會舒服d, 甚至可能有得著. anyway, 好o野一定有人知的.

hope yr period is gone.

Anonymous said...

Agreed, instead of thinking negative, we should think positive. I have been through this kind of sad period all the time. I am not a confident person bcoz of my appearance. I guess people just need times to adjust for their lives in order to get motivation. Joys and Laugh would be one of the ways to be the tool of encouragement. Keep look at the BIG world, I am sure you can help yourself and a lot of HKeses. Believe me!

Anonymous said...

我都係period 緊, 個人好沈默, 點解我咁靚仔但無頭髮, 點解我咁努力得個吉, 你就(...)
朋友的一句: 咁人地都有失敗既時候者
即刻丁晒, 唔...係喎, 用逆思考理論, 我都有個風乾既時候喎, 我係我, 你係你, 點樣比, 今日你威, 可能聽日輪到我呢, 化負能量為動力啦!

Anonymous said...

我都成日有這個問題...可能..工作壓力太大..又成日遇到牛鬼蛇神..又或者..跟本與工作性質無關,,,可能是獅子座的特性吧..說來說去..都是想為自己的鬧情緒找個合理的藉口呢...使我自己不要太過不正常..

Anonymous said...

睇完你呢編既分享 "釘" 左聲..我一直放唔底既自己...放底左...原來呢d 唔係叫假 or 狗...係叫角色扮演..."人生如戲" 嘛

銘,minicooper515 said...

灘叔,
今日放榜,自己考得還可以,有1B2C.....但依家要諗既係揀有前途既科定有興趣既科,仲要等一個月睇下有冇學位offer... 因為自己性格偏向負面..所以壓力仲大過未放榜.....
可能人地會覺得我已經好運過其他人,但我又諗緊自己一世人既lucky係咪用曬....
...我真係過份負面..orz

Anonymous said...

所謂o既逆思考其實係唔係即係將就下,接受唔可以改變o既現實?
做人最緊要就係識得放下...有好多野,做唔到就係做唔到,無o左就係無o左,你點都要接受個事實
又係三毫子一擔o既野,當我無講過啦

Anonymous said...

灘叔叔~今日先你0既entry.... 我都係尋日AL 放榜, 成績其實幾好, 1A2B2C, 不過比預期中差, 有D想appeal, 不過好waste money, 所以放棄了..... 而家好煩呀, 因為之前會考成績不太好, 真係唔知揀咩科好....之後又要等到八月先知入到邊間, 好煩哦~~~~~~